首頁 arrow 綠色短評 arrow 咱無應該稱呼中國叫作「大陸」!

咱無應該稱呼中國叫作「大陸」! PDF 列印 E-mail
發表者 李南衡   
2016/09/30, Friday

新聞報導講:中國無看咱蔡政府上任以後釋出善意,一再佇國際場合打壓台灣。根據了解,咱政府有關單位hō͘中方的電函上有改變用詞,佇部分抗議電函頂面,ùi早前稱呼中方作「貴方」,改作「你方」,表達佇部分事件頂面對中國的強硬(ngīⁿ)立場。

2008年,中國海協會會長陳雲林來台灣訪問進前的六月,有人問馬英九總統十一月kah陳雲林見面,互相beh按怎稱呼?應該是人客稱呼主人「馬總統」、主人稱呼人客「陳會長」。無疑誤無上教(chiūⁿ-kà)的馬總統講:我稱呼伊陳先生、伊稱呼我馬先生,我感覺按呢是上好的方法。,十一月初六,馬英九總統接見hit-ê無教養的陳雲林的時,陳會長稱呼馬總統「你」,上不懂的是馬英九總統歡歡喜喜接受。所以,咱對中國稱呼「你」是拄拄好niā-niā,無啥物「強硬立場」。   全世界攏稱呼中國是「中華人民共和國」抑是「中國」,但是中國足愛咱台灣稱呼in「大陸」抑是「中國大陸」。世界上有「非洲大陸」、「歐洲大陸」、「亞洲大陸」、「南極大陸」、「澳洲大陸」、抑是五百年前哥倫布(Columbus)所發現的「新大陸」-「北美洲大陸」、「南美洲大陸」。干單講「大陸」無人知影是指叼一個「大陸」。稱呼in「中國大陸」足奇怪,世界地理上無啥物「中國大陸」。Che那像全世界攏叫咱「台灣」,連中國mā按呢稱呼咱,但是足奇怪的是中國逼咱台灣對外tio̍h家己叫作「中國人的台北」(Chinese Taipei),真正是豈有此理!所以,此後,咱一定tio̍h稱呼in「中國」,稱呼咱家己「台灣」。稱呼中國叫作「中共」mā m̄-tio̍h,「中共」是指中國共產黨,m̄是國名。   仝款莫名其妙的是「中國國民黨」,in家己稱呼作「國民黨」mā愛人按呢稱呼in。中國國民黨所尊敬的「國父」孫文,規定中國國民黨譯名通告,應該譯作“Chinese Nationalist Party”,世界上真濟國親像孟加拉、愛爾蘭,馬爾他、美國攏有「國民黨」(Nationalist Party),若是干單講「國民黨」無人知影是叼一國的「國民黨」,應該kah各國「國民黨」仝款,佇頭前加一個國名。此後,in「中國國民黨」稱呼家己「國民黨」mài插in,咱一定tio̍h叫in「中國國民黨」,才會tàng突顯出偌呢hàm的代誌,那像講佇日本有一個「韓國勞動黨」、佇美國有一個「英國保守黨」,無、無人按呢。佇台灣才chhun 3.5%的人認定家己是「中國人」,竟然有一個政黨的名叫作「中國國民黨」。咱一定tio̍h一直kā叫「中國國民黨」,叫kah「中國」chit兩字kā in帶衰、叫kah無人愛選in、叫kah無人愛插in!   咱tio̍h稱呼對岸hit國是「中國」,kah「中國國民黨」黏hō͘ tiâu!
 
< 前一個   下一個 >