首頁 arrow 綠色短評 arrow 真濟中國人是清醒的!

真濟中國人是清醒的! PDF Print E-mail
Written by 李南衡   
Thursday, 13 October 2016

十月初三,中國流亡作家余杰寫一篇文〈陸客是勇敢抑是卑賤〉講,蔡英文總統佇桃園機場視察的時,拄tio̍h一個陸客團,伊無sáng勢、有kah in講幾句話。一名陸客忽然間大聲喝:「和平統一。」蔡英文無任何反應tio̍h離開。中國媒體大力報導講,chit位旅客真勇敢,敢佇「台灣地區領導人」kah「台獨份子」 面前喝出心聲、捍衛祖國統一。

六月十三,蔡英文總統去苗栗視察,傳出中晝食「一千箍法國菜」,總統府講,食飯的費用是由客委會主委李永得特支費支出的,m̄是民間朋友請的。提供chit遍聚會場所的餐廳老闆,是一位有the̍h tio̍h法國藍帶廚藝的苗栗少年子弟,無偌久以前才轉來故鄉開chit間kā客家元素融入去法國式料理的餐廳。六月十三的產業座談特別選chit-ê地點,一方面表示對chit種轉來故鄉創業熱情的肯定,一方面mā是透過chit-ê成功經驗的場所,kah來開會的創業、產業朋友共同對話。   第二工,中國國民黨政策會執行長蔡正元佇伊的面冊頂面罵講,蔡英文上任以後tio̍h干單注重食啥物,每個月六萬箍倩一位御用總舖師。Taⁿ去苗栗視察,二四個大官小官開客委會的預算、食納稅人的錢,歹看相。   凡若有報導台灣歹名聲的代誌,中國官方的電子媒體抑是網路攏真愛轉報。中國《新浪網》以「蔡英文開一千箍公費食法國大餐hông批評 否認是民眾出錢的」作新聞標題,引起中國網友熱烈討論。有人直接講:「台灣散鄉島,食200箍人民幣tio̍h算奢華哦!」有人講:「台幣一千箍的法國大餐應該無算濟,一定是真俗的法國大餐。」有人講:「連阮村長飲水錢都無夠。」有人講:「才1,000箍台幣niā-niā?若是kah阮的領導比起來,chit條新聞是teh阿老蔡英文是boh?」有人講:「那會感覺蔡英文一點仔都無過份,才200箍人民幣!佇阮大陸,若是有人敢請科級以上的官員食200箍的飯,伊明明是m̄知死活。」甚至有人講「台灣人散赤koh m̄-bat見過世面,200箍有啥thang講?」   確實有效,hō͘中國人罵罵一下,一寡「散赤koh m̄-bat見過世面」的台灣人自按呢無koh講啥。In上驚hō͘中國人罵。   咱佇台灣的人攏知影,受過中國國民黨愚民教育的人,真濟人自按呢頭殼歹去,但是koh khah濟人是清醒的。咱看中國人對蔡英文食一千箍法國餐的看法,tio̍h知影真濟中國人是清醒的。中國媒體報導佇桃園機場,一位中國客佇蔡英文總統面前大聲喝「和平統一」,講hit位中國旅客真勇敢。咱相信koh khah濟清醒的中國人會阿老蔡英文總統有風度,會欣羨台灣的民主kah自由。
 
< Prev   Next >