首頁 arrow 綠色短評 arrow 完全無仝的閱兵,讚!

完全無仝的閱兵,讚! PDF Print E-mail
Written by 李南衡   
Monday, 17 October 2016
一個國家佇重要的節日、抑是軍隊出征進前、凱旋轉來的時陣會舉行閱兵,表面上是為tio̍h慶祝、鼓舞,致敬,實際上是beh展示軍力、向鄰近的國家抑是敵人展示上新的武器、裝備、新的兵種,有展手骨大枝,威嚇別人的用意,同時會tàng提振軍威、鼓舞士氣。 今年雙十節是蔡英文總統就任後頭一遍的閱兵,kah往年傳統式的閱兵完全無仝,mā佇台灣寫落頭一遍「非武裝閱兵」的紀錄,主題是「向風雨英雄致敬」,所展示的包括陸海空三軍、警察、消防人員,佇國家有難、人民受苦的時陣,in按怎奉獻出家己的血汗、甚至生命kah災難搶時間,幫助受苦受難的同胞。   空中分列式,以救災、運輸直升機取代以往的戰鬥機衝場,佇地面分列式,國軍特戰、工兵部隊等kah警察消防救災英雄,kah挖土機、兩棲突擊車等救災裝備作夥出現。空勤總隊海豚直升機展神威吊掛國旗,向救災英雄致敬,展開空中分列式的序幕。國軍EC225加S70C救護直升機接佇後面,猶有陸軍運輸機宣告軍民同心,守議家園。手夯划(kò)船槳、褪腹theh勇壯威武的蛙人。Ùi陸軍特戰隊到工兵、化學兵等救災部隊,通過總統府前的時,蔡英文總統kah蘇嘉全立法院長the̍h頂面有印「有你真好」的加油布條kā in致敬。救災絕對有份的警察kah消防兄弟,十四名警察用時速五公里、一車半的車距,1.200CC的重型機車隊整齊駛過。無論佇高雄市氣爆的救災、重建,抑是風颱大水中中拚命救災、運送物資、幫忙徹退災民,kah災後重建,咱看會tio̍h、想會tio̍h的救災英雄kah各種器具、救災的情景,koh一遍佇咱的目睭前浮現出來。佇風颱過了的chit-ê時陣,用滿滿的感謝,hō͘辛苦的救災英雄成作chit遍慶典的焦點。   因為閱兵的主題是「向風雨英雄致敬」,所以國軍特別kā參演的兩棲登陸車kah裝甲車頂的武裝攏卸除,以救災的形象參與地面分列式展演。按呢,引起一位退伍的于北辰將軍不滿,伊批評講欠缺武裝參演「hō͘國軍受委屈」,伊佇面冊頂面以〈無虎牙的猛虎〉作題目寫文,講國軍正規部隊真難得會tàng公開演出,最後竟然是hō͘國軍欠缺武裝參演,用chit款的「霸王卸甲」戲齣hō͘全民檢閱,「那會對得起長年作戰鬥訓練本務的國軍袍澤咧!」Chit位退伍將軍完全無瞭解chit遍閱兵的主題是「向風雨英雄致敬」,m̄是beh展示國家的戰力。   蔡英文總統向救災的風雨英雄講:「有你真好!」咱每一個台灣人攏會使互相講chit句話。因為伊辦chit場完全無仝、有溫度、會hông目箍燒lō的閱兵,咱mā beh向蔡英文總統講:「有你真好!」
 
< Prev   Next >