首頁 arrow 綠色短評 arrow 台灣人會愈來愈歹喘氣!

台灣人會愈來愈歹喘氣! PDF Print E-mail
Written by 李南衡   
Monday, 24 October 2016
tio̍h改善PM2.5(細懸浮微粒)濃度,台中市府多方面努力已經收tio̍h成效,十月十四環保局長白智榮表示,根據環保署數據顯示,今年一至至九月PM2.5含量每立方公尺年均值21.26微克,比舊年同期每立方公尺22.18微克降落真濟,市政府會繼續努力提升空氣品質。大台中空氣品質會hôngPM2.5濃度一直懸懸落(lak落來。市政府環保局有成立空污減量小組,也制定管制生石炭kah禁用石油焦自治條例,約束企業減少污染排放,而且主動協調台電「環保降載」。管制固定、移動kah逸散源三方面的污染源。 話講猶未煞,受擴散條件不良影響,十月十七彰化、員林的PM2.5濃度偏懸到10「紫爆」等級,空氣品質真差,環保署提醒敏感族群減少戶外劇烈活動。   受擴散無好的影響,十月二十中晝以後,台中以南的縣市全部淪陷,PM2.5攏達到紅色警戒以上,歸個中南部phú-phú矇矇,其中台中西屯、彰化、員林、斗六攏達到有害(PM2.5到10)的「紫爆」等級。另外苗栗三義、台中沙鹿kah彰化線西等地區因為受擴散條件影響,臭氧濃度偏懸,空氣品質達到不良等級。中部連續五工紫爆,十月二一人行佇路裡,目睭會疼、koh會khuh-khuh嗽。台中市議員建議比照台化模式,kā台中火力電廠關掉!   Hō͘咱想起今年四月三十,台南以北PM2.5達到「紫爆」程度。當時衛生福利部國民健康署提醒民眾tio̍h做好自我防護措施,而且提出五個妙招。Beh外出tio̍h會記得掛嘴lam;盡量減少佇戶外活動時間,特別是老人、囝仔抑是慢性呼吸道疾病的患者;Ùi室外進入室內的時tio̍h會記得洗手、洗面、清潔鼻孔;適當關門窗,減少PM2.5入來厝內;上重要是生活tio̍h有規律,適當運動,維持身體健康狀態。老實講,若是歸個台灣空氣污染無改進,個人按怎做好自我防護措施攏是治標。Che那像一個患者人艱苦去看醫生,醫生無kā講伊tio̍h啥物病、會開啥款藥仔hō͘伊食幾工,干單叫伊tio̍h歇睏、加飲水。Che那是醫病的醫生?   台中市政府的作法會堪得kā阿老,in可能kā ùi中國外來的因素暫時按下,假定攏是境內發生的,ùi固定、移動和逸散源三方面的污染源落去管制,而且有成立空污減量小組,也制定管制生石炭kah禁用石油焦自治條例,約束企業減少污染排放,而且主動協調台電「環保降載」。雖然地方政府權利有限,總是台中市政府ùi污染源著手的作法,甚至想beh比照台化模式,kā台中火力電廠關掉,che才是治本。值得其他各縣市學習,甚至連環保署都應該謙卑向台中巿學習。   若無好好解決空氣污染的問題,保證台灣人會愈來愈歹喘氣!
 
< Prev   Next >