首頁 arrow 綠色短評 arrow 正直誠實的許志雄作大法官,是咱台灣人的福氣!

正直誠實的許志雄作大法官,是咱台灣人的福氣! PDF 列印 E-mail
發表者 李南衡   
2016/11/03, Thursday
十月二五,立法院行使五位大法官被提名人同意權投票,民進黨團決議五位攏支持。中國國民黨支持張瓊文、反對許志雄、黃瑞明、黃昭元、開放黨籍立委家己決定是是支持詹森林。親民黨總召李鴻鈞表示,若無認同中華民國tio̍h無應該擔任大法官,所以對許志雄、黃瑞明、黃昭元三位投反對票。時代力量黨團開放投票。最後,佇民進黨全力支持下,許志痽72票、張瓊文94票、黃瑞文74票、詹森林92票、黃昭元72票同意,攏通過過半規定,當選新任大法官。 Tī威權、白色恐時代,獨裁者講一(chi̍t)、無人會使講兩(nn̄g),若有無仝款的聲音,tio̍h是無愛黨無愛國、tio̍h是共匪仝路的人、tio̍h是思想有問題,致使真濟人選擇作「沈默的多數」、若有人發出不平的聲音,真有可能hông掠去修理,判重刑甚至hō͘ in piāng掉。台灣今仔日的民主自由人權,tio̍h是真濟台灣先賢先輩用血汗,目屎、青春甚至犧牲生命所爭取來的,值得咱永遠懷念尊敬。Hit當時恬恬無出聲的人,咱絕對無怪in、mā m̄敢講in按怎。Hit當時夯順風旗、phô͘- phô͘-tháⁿ-tháⁿ獨裁者、kā獨裁者放的屁準作「聖旨」、狗傍(pn̄g)虎威、腳踏馬屎傍官氣,爭取一官半職足得意,咱當然看in bē起。   今仔日台灣雖然是民主自由的所在,每一個人攏會使發表家己的意見,講出心內話。總是猶有真濟人m̄敢講出老實話,聽人按呢講干單敢佇心內爽。Khah可惜的是有一寡人奴性未改、白賊講慣勢、聽人講老實話會驚、甚至會受氣。   Chit遍蔡英文總統提名的五位大法官,會使講攏是真優秀的人選,咱聽in佇立法院接受立法委員審查的時,in攏會tàng勇敢面對、誠實應答,無虛假。設使因為in誠實應答煞來失去作大法官的機會,in那像mā無所謂的氣魄。按呢敢m̄是一位大法官上基本的要求?特別是許志雄教授tio̍h kā大大阿老。   中國國民黨立委柯志恩chhōe出許志雄早前所寫的文章講,中華民國憲法「是外來憲法、虛幻憲法、失根憲法,鬥鬥的憲法」,許志雄講hit篇文章是伊寫的無m̄-tio̍h。伊koh講,咱的國家m̄是一個正常的國家,目前所用的「中華民國」是中國棄sat無用的國號。中華民國憲法是佇中國制定的,m̄是為台灣兩千三百萬人量身訂做的。台灣需要一部「合時、合用、合su的憲法」。中國國民黨立委問伊有願意唱國歌無?許志雄應講:人bē-tàng違背良心,國歌第一句提tio̍h的三民主義問題真濟。但是伊強調,學者有學者的主張,大法官的職權mā bē去處理制憲、正名的問題。   親像許志雄chiah正直誠實的人作大法官,是咱台灣人的福氣!
 
< 前一個   下一個 >