首頁 arrow 綠色短評 arrow 中國國民黨按呢teh食咱台灣人的錢!

中國國民黨按呢teh食咱台灣人的錢! PDF Print E-mail
Written by 李南衡   
Monday, 14 November 2016

中國國民黨歸個黨按怎霸佔台灣人的財產,現在已經有「行政院不當黨產處理委員會」teh處理,逼中國國民黨吞食台灣人的財產攏總吐出來還台灣人,che是「轉型正義」的一部分。咱知,「轉型正義」是一個民主國家對過去獨裁政府所做的違法kah不正義行為的彌補,通常有司法、歷史、行政、憲法、賠償等方面,上蓋根本的基礎是歷史真相。

一下查看歷史真相,咱才知影早前台灣的公務員特別是一寡大尾的政務官,足bē見笑,竟然kā擔任黨職的年資攏算作公務人員的年資。hō͘咱看tio̍h黨庫按怎通國庫。In在職的時按怎非非sám做咱m̄知、mā無伊法。退休了,加領足濟退休金、繼續吸(suh)咱台灣人的血。咱tio̍h kā in算清楚,一角錢mā不准hō͘ in koh吞食落去、若準有食落去的mā tio̍h 逼in吐出來!好佳哉蔡英文總統已經出聲,行政院會著手推動改革黨職併公職領退休金chit項代誌,透過民進黨立法院黨團修法kā加落去的黨職年資phut掉,立法若通過,會影響真濟公務人員的退休金、減少國庫一大開支。Che mā是轉型正義的一部分。   上大條的是前副總統連戰,伊現此時報的公職年資是三十三年、月退會tàng領二十四萬八千,事實上內底有三年八個月的黨職年資,意思是伊每個月加領咱台灣人的血汗錢五萬箍,三十年國庫會tàng省一千八百萬。前總統府秘書長吳伯雄現此時報的公職年資是二一年、其中有兩年一個月是黨職。前交通部長林豐正現此時報的公職年資是十八年、其中一半khah加九年六個月是黨職。前考試院長關中,現此時報的公職年資是三十年、其中有十六年是黨職,chhun十四年mā bē tàng領月退。上離譜的是前台中市長胡志強報的公職年資是二五年,每個月領十七萬、三十年月退會tàng領六千一百二十萬,其中三分之二是黨職,扣掉十五年黨職,年資無夠、變作無月退、干單會tàng一遍領清七百十四萬,三十年國庫省五千四百零六萬。因為照規定,公務人員年齡六十歲以上、服務年資二五年以上,抑是年齡滿五十五歲、服務年資滿三十年才會tàng領月退休金。立法委員段宜康piak孔講,胡志強ùi 1975年九月到1985年八月chit十年佇英國讀冊期間,伊一面領中國國民黨民眾服務總社的薪水作連絡員、書記、黨務連絡員,照理講學生bē使作jiàu-pê-á、mā bē使作公務員。親像胡志強chit種大尾的有十外個,其他細尾的黨職併公職的公務員有兩百三十二人。另外,教育人員軍職人員是m̄是有黨職併公職猶未清查。   你看,中國國民黨按呢teh食咱台灣人的錢!你敢bē受氣?
 
< Prev   Next >