首頁 arrow 綠色短評 arrow 我無犯罪,我是清白的!

我無犯罪,我是清白的! PDF Print E-mail
Written by 李南衡   
Monday, 14 November 2016

十一月初八,《台視新聞》報導,台北市有一位婦人人手捾兩大kha塑膠袋仔,內底té in兜的糞埽滿滿,專工the̍h去百貨公司的糞埽桶tàn掉,一位民眾看tio̍h kā講,家己厝裡的糞埽無應該the̍h來百貨公司的糞埽桶。無疑誤hit位見笑轉受氣的婦人人講,我是chit間百貨公司的大客戶,我是讀法律的,我按呢做無犯罪,百貨公司以外,無人會tàng管我。真的,根據環保局解釋,伊厝裡的糞埽tàn佇公共糞埽桶,最懸會使罰六千元。但是百貨公司屬私人機構。若無提告、恐驚無法thang罰伊。總是一個讀法律的高級智識分子按呢做敢好?

想起四十外年前,有一遍坐觀光號火車去高雄,中途車長來驗票。一位旅客買普通車票來坐觀光號,車長要求伊補票。伊辯解講,普通車人傷濟相當kheh,我走來坐覯光號,減一人佇hia kheh,敢m̄是真好?何況,我佇chia是坐無人坐的空位,並無侵犯tio̍h任何人的權益,我是按怎tio̍h補票?車長笑笑應講:若是每一個人攏kah你仝款,敢m̄是天下大亂?Hit位旅客的應答世界級的,四十外年後猶koh記kah清清楚楚,他講:「你講話tio̍h用事實作根據,那有影每一個攏kah我仝款?歸台車mā干單我一個人按呢niā-niā。你講話bē使烏白講!」車長無插伊tioh離開。到後一站停車的時,車長kah一位警官來,雖然伊一直講:我是清白的,我無犯罪,警官猶原chhōa hit位旅客落車去處理。   九月初七,民進黨立委何欣純、李麗芬召開記者會指出,佇台北市南海路四十五號的「中華民國孔孟學會」,1960年代到taⁿ超過一甲子,占用教育部房舍約六百平方公尺無納半錢錢,甚至m̄-bat繳過一角銀水電費。學會講阮是清白的、厝是政府配hō͘阮的。雖然In家己講是清白的、無犯罪,總是已經決定後個月beh搬出去。該學會創會永久名譽理事長是蔣介石,現任理事長是前國民黨立委李慶安。上好笑的是in的網站寫現任名譽理事長馬英九是現任總統。今之古人乎?   講tio̍h chit位馬英九,十一月初七,民進黨立委柯建銘自訴控告伊洩密等案,台北地院開庭庭訊進行兩點半鐘了後,馬英九離開法院的時講:「我對我的清白有信心,我對法院的公正有期待。」咱實在m̄知影馬英九那會自認無罪?馬英九涉嫌教唆前檢察總長黃世銘洩密,黃世銘佇伊的口供講:「2013年九月初一向馬總統報告關說案了後,奉馬總統之命,tī九月初四koh再向當時的行政院長江直樺kah前總統府副秘書長羅智強說明調查內容。」伊咬馬英九咬chiah ân,而且根據伊的口供已經判刑定讞。馬英九郓有可能無罪?   我無犯罪,我是清白的!m̄是先講先嬴、tio̍h看事實是按怎。
 
< Prev   Next >