首頁 arrow 綠色短評 arrow Chit款中國e5文化土匪!

Chit款中國e5文化土匪! PDF 列印 E-mail
2009/02/10, Tuesday
        政治大學黃惠禎老師e5博士論文《左翼批判精神e5鍛接:四0年代楊逵文學及思想e5歷史研究》ti7二00五年七月通過,幾個月後,有一位中國來台灣訪問e5學者樊洛平透過人beh ka7討一本論文,過無幾工講伊已經佇政大社資中心ka7歸本博士論文影印好ahm7免伊贈送。二00八年十二月初二,黃老師佇冊店看tioh8一本樊洛平女士e5《冰山下面綻放e5玫瑰:楊逵及伊e5文學世界》,真好奇theh8起來掀看mai7,發現真濟所在讀tioh8真順,原來是歸段歸段照伊e5博士論文抄落去e5,連註解ma7原封不動照抄不誤。

        咱知影有台灣e5冊、CD唱片、影片DVD銷去中國賣無一絲仔,翻版盜印盜錄e5賊仔版賣出e5數量有可能幾萬幾十萬甚至幾百萬倍,咱一點仔辦法都無。問題是樊洛平寫e5 chit本冊簡體字版二00八年四月佇中國出版,五月koh佇台灣出版繁體字版。黃惠禎老師就寫批hou7台灣出版chit本冊e5出版社,列出博士論文幾頁至幾頁原文及註解,及樊洛平著作幾頁至幾頁以及幾頁至幾頁e5註解作對照,攏總有三大段。樊洛平e5攏無註明伊chit三段文字及註解是引用黃惠禎e5博士論文,甚至連參考資料內底ma7攏無提tioh8黃惠禎三字。真正是可惡至極!

        咱攏知,學術論文及著作真趣味,引用愈濟人e5愈濟資料,愈表示伊看真濟著作及參考資料、ma7表示伊誠認真。總是有一個前提,就是一定tioh8註明資料e5出處,啥人ti7 tang時佇叼位出版抑是發表e5作品,攏tioh8交代清楚,按呢m7但表示伊做學問認真及負責,ma7是對原始資料作者e5尊重。總是難免有少數投機e5人偷用別人研究e5成果來做家己e5著作e5一部分,想講無人知。若是hong5發現tioh8是真削體面e5代誌,hong5看無起、甚至會hong5踢出學術界,除非伊誠心認錯,公開發表道歉e5聲明,才有可能hong5原諒。

黃惠禎老師只是希望樊女士會tang3秉持學術良心及伊對話。啥知樊女士透過台灣e5出版社講一大堆完全無誠意e5辯解,講啥物ma7che三段nia7-nia7。逼黃惠禎老師koh再寫批「請樊洛平mai3 koh詭辯,誠心道歉認錯!」舉出猶koh 真濟所在是抄伊e5博士論文。

  今仔日咱拄tioh8 e5是完全無認錯,硬beh及你烏白花,講一寡五四三e5理由,按呢橫霸霸,已經m7是學術賊仔,明明就是文化土匪!除了抗議以外,咱應該佇台灣提出控告,告kah伊會失禮為止。咱看二00七年四月美國向WTO控告中國無認真保護智慧財產權,今年一月二七WTO才裁判中國敗訴。當然控告會了真濟時間,ma7是愛ka7告,若無in食了知滋味會愈來愈歹款!(090206)

 
< 前一個   下一個 >