首頁 arrow 綠色短評 arrow 國共兩黨相爭,害孫中山見笑死!

國共兩黨相爭,害孫中山見笑死! PDF Print E-mail
Written by 李南衡   
Wednesday, 30 November 2016
十一月十一,佇北京人民大會堂舉行「紀念孫中山先生誕辰150周年大會」,中共中央總書記、中國國家主席席習近平佇大會發表重要講話。伊講中國共產黨人是孫中山先生革命事業上堅定的支持者、上忠誠的合作者、上忠實的繼承者。 佇台灣的中國國民黨對孫中山先生有夠尊敬,《中華民國憲法》第一條tio̍h講:中華民國基於三民主義,為民有、民治、民享之民主共和國;佇in的黨歌後來改作「國歌」的頭一句tio̍h唱講:「三民主義,吾黨所宗。」中國國民黨大大細細,攏講中國國民黨才是孫中山先生真正的繼承者。   國共兩黨攏真正是孫中山先生的繼承者,那有可能相刣?敢是一個真的、一個假的?m̄是。原來兩個攏m̄是孫中山先生真正的繼承者。   中國共產黨上愛講的是1924年孫中山先生發表的三民主義,一開始tio̍h講:「民生主義就是社會主義,又名共產主義,也就是大同主義。」好,咱干單用三民主義的民生主義來檢驗國共chit兩黨。民生主義有兩大重點:平均地權kah節制資本。平均地權是講:土地應該歸國民共享、消除少數人操縱土地所有權。方法是:自訂地價、報傷懸、照價課稅,報傷低、照價收買,漲價歸公。節制資本是講:限制私人企業經營的範圍、直接徵稅,用累進稅率,多徵資本家的遺產稅kah所得稅。國共兩黨所做的,kah孫中山先生的民生主義攏拄拄行倒反(péng)。北京大學所做的《中國民生發展報告2014》顯示,「1995年我國家庭淨財產的基尼係數是0.45,2002年是0.55,2012年達到0.73。照國際標準,超過0.4就是屬佇危機水平。報告認為目前中國三成以上的社會財富hō͘上頂懸1%的家庭所占有,上下底25%的家庭干單有一成社會財富。」一台人民幣一千萬的保利超豪華汽車,2005年中國是全球上大的市場,仝chit-ê 2005年,真濟省份一個家庭每個月收入是人民幣一百元。佇台灣,2000年朱立倫擔任中國國民黨「黨產小組召集人」的時,估算中國國民黨產市值近新台幣一千億,另外2015年一月出版的《天下》雜誌the̍h tio̍h的資料顯示台灣前1%大好額人所得占比,2015年已經占全國所得的10.85%。國共chit兩黨是實行啥物節制資本?   耶穌對伊的學生講:「我用新的誡命hō͘恁,就是恁tio̍h相疼,親像我bat疼恁,恁也tio̍h按呢相疼。恁若相疼,眾人beh對按呢知恁是我的學生。」若是嘴講是基督徒,卻kah耶穌的教示顚倒頭行,會hō͘耶穌見笑死。仝一個道理,中國國民黨kah中國共產黨相爭講是孫中山先生的繼承者,卻kah孫中山先生主張的三民主義顚倒頭行,會害孫中山先生見笑死!
 
< Prev   Next >