首頁 arrow 綠色短評 arrow 那會使按呢公然製造謠言!?

那會使按呢公然製造謠言!? PDF 列印 E-mail
發表者 李南衡   
2016/12/06, Tuesday
tio̍h日本核災區食品進口,有真濟人會驚。十一月三十,台中市親民黨議員段緯宇、洪金福、中國國民黨議員吳顯森、陳成添kah無黨籍議員陳清龍、朱元宏六位聯合質詢,爆料台中市市面上早tio̍hteh賣「核災區食品」,台中市面上買tio̍h的商品排排佇議事廳。有網友看了,去市面上chhōe tio̍h kah議員所講的「核災區食品」仝一款的商品,頂面明明寫:日本森永製果株式會社「授權」台灣森永製果股份有限公司「製造」,而且頂面有印「台灣製」三字。上要緊的是商品條碼,商品頂面是印「47」、表示台灣製造。若是日本製造條碼是「49」、中國是「69」、韓國是「88」。議員 the̍h青森縣出品的美味調味醬出來罵,咱知青森縣知事(縣長)每年攏有來台灣推銷「青森蘋果」,青森縣明明是「核災區」。台中市議員按呢公然teh製造謠言。 十一月二九,復興航空公司提交復飛營運計劃的最後期限,民航局前局長張國政開記者會,宣布阮有團隊有意beh接手復興航空,呼籲民航局暫時khah慢收回航權。一時復興航空股票ùi「跋停板」翻身一直起,買賣量ùi一千兩千兩萬一直衝到五萬五千張,股價mā衝到「起停板」。張國政無講投資者的名、無營運計畫,事先無kah復興航空負責人講好勢、mā無kah民航局講過。第二工,張國政宣布接手復興航空破局ah!復興航空股票自按呢鎖死佇「跋停板」,五萬張股票套tiâu,股民哀父叫母。張國政按呢公然teh製造謠言。   十一月三十,中國國民黨政策會執行長蔡正元佇中國國民黨中常會報告伊chhōa團去美國訪問的成果,講美國國務院「主動提起」民進黨政府處理黨產問題,無顧tio̍h法院的裁定,明顯不符合民主國家的正常作為。伊強調講,中國國民黨訪問團並無任何加油添醋抑是講了過頭,干單完全客觀據實的說明,無kā國內朝野政治鬥爭的現象提到國際檯面頂頭。但是人既然關心有問起,咱mā tio̍h詳細向對方說明。真失禮,美國在台協會(AIT)當日tio̍h嚴正駁斥講:美國佇中國國民黨黨產議題頂面「無採取任何立場」。蔡正元按呢公然teh製造謠言。   人為什麼會公然製造謠言?有可能是歹心beh擾亂社會、抑是為tio̍h beh打擊執政者;有可能是為tio̍h個人抑是某一個團體的利益;有可能是beh提高家己的身分等原因。是按怎有真濟人會相信謠言?因為製造謠言的人m̄是無名小卒,伊有一定的社會地位抑是權威性,那像張國政砲轟交通部長、行政院長m̄-bat航空,干單伊bat、伊有權威。無論啥物謠言,hō͘ in講tio̍h那像是真的。   是按怎in會使按呢公然製造謠言,敢真正無人有伊法?!
 
< 前一個   下一個 >