首頁 arrow 綠色短評 arrow 看義大利修憲公投失敗

看義大利修憲公投失敗 PDF 列印 E-mail
發表者 李南衡   
2016/12/15, Thursday
十二月初四,意大利舉辦修憲公投,全國五百萬有選舉權的人有三百外萬人出來投票、將近七成的投票率,會使講足懸。投票結果有59.1%反對、40.9%贊成,執政將近三年、義大利上少年、四十一歲的總理連志(Mattep Renzi)照公投前的約束、修憲公投若無過伊beh辭職落台。 Chit遍義大利修憲的重點是啥?因為現此時參議院kah眾議院權力平等,想beh kā 315個參議員人數削kah chhun 100個。贊成的陣營以現任總理連志作頭,伊表示公投若輸伊就辭職;反對陣營主要是「反建制」(反對現時社會已經建立的體制)的「五星運動」,主張意大利退出歐元區。贊成陣營支持者,認為改革會tàng結束過去六十八年久的舊國會體制、參眾兩院互相kā球踢來踢去的現象,修憲了會提高立法的效率,koh會tàng減少五億歐元的開支。反對陣營的支持者認為按呢會威脅民主體制、會造成總理集權,而且省也省無諾濟錢。   Chit遍義大利修憲公投,會大大影響意大利的政治行向。「贊成派」若輸去,表示此後改革的腳步會放慢,面對直直beh倒去的金融系統、長期軟siô-siô的經濟、kah一直落(lak)bē落(lo̍h)來的高失業率,修憲無過對現時政府的前途當然是一個真大的衝擊,而且會影響歐洲一體化的前景,特別是tī英國公投決定脫離歐盟以後,chit遍hō͘反對陣營嬴去,雖然投反對票的人有真濟是對連志總理個人的作風bē爽,並m̄是反對留佇歐元區。但是,主張退出歐元區的「五星運動」發展勢面一定會koh khah猛,甚至要求舉辦脫離歐元的公投,事實上若真正舉行公投,人民無拄拄贊成義大利退出歐元區。   雖然連志總理已經向馬塔內拉(Mattarella)總統正式提出辭職,總統kah各黨派協商組成新政府進前,請連志擔任「看守總理」。但是,chit遍公投大嬴的「五星運動」kah反對移民的「北方聯盟」teh推動原本定tī 2018年的大選提早舉行,連志總理伊所屬的民主黨猶原是上大黨,放調講無teh驚提早大選。   咱ùi義大利修憲公投得tio̍h啥物教示?無論諾呢好的一個政策beh推捒、抑是一個足好的公投主題,一定tio̍h想出上好的方法,像講用卡通影片、用人搬的影片、趣味好看koh足好瞭解的說明,去全台灣各所在說明hō͘人民知影有啥物好處、有啥物歹處,政府為啥物beh按呢做,人民才有可能誠心樂意接受、作出上理性的決定。像講最近佇台灣立法院所通過的「一例一休」政策,連負責的政府官員都講bē清楚,人民beh那有可能瞭解「一例一休」是啥物碗糕,beh按怎叫人民接受咧!
 
< 前一個   下一個 >