首頁 arrow 綠色短評 arrow 橫霸霸的中國chit遍踢tio̍h鐵枋!

橫霸霸的中國chit遍踢tio̍h鐵枋! PDF Print E-mail
Written by 李南衡   
Friday, 23 December 2016
2004年,加拿大總理保羅馬丁因為驚中國抗議,佇一位大主教的厝裡接見達賴喇嘛;2007年九月二十,奧地利總理巨生堡(Gusenbauer)無管中國反對,接見達賴喇嘛;九月二三晚時,德國總理梅克爾(Angela Merkelkah達賴喇嘛展開歷史性的會面。回應中國的抗議、警告,總理府發言人講總理啥物時陣beh kah啥物人見面,是總理的代誌。中國隨時取消一場原本預定kah司法部長佇慕尼黑舉行的保護專利會談;十月十七,佇華盛頓,美國總統富施(George Bush)親身向達賴喇嘛頒發國會金質獎章,第二工,中國當局傳召美國駐中國大使表達抗議;十月二九,加拿大總理哈伯(Stephen Harper)佇聯邦大廈國會的總理辦公室接見達賴喇嘛。中國抗議講按呢「是對中國內政的粗暴干涉,嚴重損害中國人民的感情,一定會嚴重影響中加關係。」有參與會面的加拿大官員肯尼講:「我希望全世界攏會明白:政擊一位拚勢爭取家己人民自治的、愛好和平的七十二歲出家人,實在是枉費氣力。」今年十一月十八,達賴喇嘛去蒙古訪問四工,中國要求蒙古取消接待計劃,蒙古無插伊。中國發動報復,蒙古拜託印度幫忙,印度外交部公開表示:作蒙古的親密朋友、精神厝邊,蒙古人民上艱難的時陣,阮準備好勢beh kah蒙古合作;十二月初十世界人權日,達賴喇嘛受邀請去印度總統府參加一場提倡保障兒童權益的大型活動,十一,梅溪志(Pranab Mukherjee)總統佇總統府會見達賴喇嘛,中國表示強烈不滿kah堅決反對。 中國靠勢伊十四億外人口、經濟大國,全世界想beh kah伊做生理的國家無人愛惹伊、盡量激笑面,伊煞想講全世界的人攏驚伊、攏tio̍h順伊,動bē-tio̍h就起屁面、惡chhih-chhih、愈來愈m̄是款!但是mā那像人愈來愈無teh驚伊。   十二初三,美國總統當選人川普佇Twitter鋪文講:「台灣總統今仔日拍電話祝賀我當選總統,多謝!」中國擋bē-tiâu美國候任總統kah台灣總統通電話、koh khah bē tàng忍受伊稱呼蔡英文是台灣總統。相信一直拍電話hō͘白宮kah美國國務院抗議,致使有人kā美國候任總統川普thuh頭,中美兩國建交三十七年以來的慣例是:美國官員bē使kah台灣官員正式來往。伊hông吵kah火着起來,佇Twitter koh鋪文講:咱賣人幾十億美金的軍火,是按怎講我bē使接一通in拍來祝賀的電話,實在真趣味!閒仔話無停,而且提醒伊美國tio̍h堅守「一個中國」政策,害伊歸ê人掠狂,接受福斯新聞訪問,伊講,我bē爽中國按呢kā我喝起喝倒,是按怎另外一國會使來干涉我接一通電話。咱是按怎tio̍h hō͘「一中政策」縛死死!續落去kā中國罵kah臭頭。人笑講:橫霸霸的中國chit遍踢tio̍h鐵枋!
 
< Prev   Next >