首頁 arrow 綠色短評 arrow 母親的名叫台灣

母親的名叫台灣 PDF Print E-mail
Written by 李南衡   
Friday, 30 December 2016

母親是山/母親是海/母親是河/母親的名叫台灣/母親是良知/母親是正義/母親是你咱的春天。兩千萬粒的蕃薯子/敢叫出母親的名/台灣敢是hiah歹聽/想tio̍h心寒起畏寒。‧,,上路尾唱講:/兩千萬粒的蕃薯子/m̄-thang恬恬出聲/勇敢叫出母親的名/台灣啊/台灣啊/你是母親的名。

二十年前,佇咱「綠色和平廣播電台」吳念真kah蔡振南主持的節目中接tio̍h一通call-in的電話,伊自稱是駛tho-la̍k-khù的王文德,家己寫詞家己寫譜的一首歌,敢會使唱hō͘恁聽?唱了,吳念真葛贊,請伊kā歌詞歌譜寄來電台。吳念真有徵求伊的同意kā改幾字歌詞,蔡振南決定beh kā chit首歌唱hō͘紅、唱hō͘伊紅遍全台灣。Hit兩年確實全台灣大人囝仔攏會曉唱,佇海外的台灣人聽tio̍h chit首歌目箍攏會紅。真可惜,二十年過了,當年的紅嬰仔今年tio̍h作兵、當年三十歲的少年家今年tio̍h作五十歲大生日,兩千三百粒蕃薯子猶原m̄敢叫出母親的名。Che實在是咱台灣人的悲哀! Chit二十年來,母親的名按怎hông糟蹋:逼咱tio̍h叫母親的名「台澎金馬」、mā逼咱tio̍h叫母親的名「中華台北」(英文寫作Chinese Taipei意思是中國人的台北、抑是中國的台北),佇外國除了kah咱有邦交的國家,有名叫作「中華民國」大使館,佇其他的國家大部分攏叫作「駐某某國台北經濟文化代表處」、抑是「駐某某國台北代表處」,那像咱國的外交部是屬台北市管的。有一寡神經麻痺的人kā母親的名叫作「中華台北」、抑是母親的名hông叫作「中華台北」mā慣勢慣勢。無疑誤最近中國大細聲講,台灣若假siáu,以後不准台灣佇國際場合使用「中華台北」,那像咱足giàn用chit-ê m̄知意思、a-lí-put-ta̍t的名咧!上好是mài用!咱母親的名叫作「台灣」,真濟人那像煞bē記得!   十二月初二,美國傳來一聲全世界攏有聽tio̍h的大砲聲:新當選的美國總統Trump佇伊的Twitter po文講:台灣總統蔡英文今仔日拍電話來祝賀我當選美國總統,真多謝!佇國際上,國家的頭人伊第一個公開叫出咱母親的名台灣。十二月二八,日本傳來第二響的大砲聲:1972年日本kah咱斷交到taⁿ四十四年久,日本佇台灣的外交窗口叫作「公益財團法人交流協會」,決定ùi 2017年一月初一開始正名作「公益財團法人日本台灣交流協會」,正確!按呢m̄才有清楚到底是啥人kah啥人交流。Chit兩聲大砲,明明kā全世界的人講,in大聲叫出咱母親的名台灣的同時,稱呼蔡英文是台灣總統,mā表示in是以「國對國」對待咱。   別人大聲叫咱母親的名台灣,是按怎咱m̄敢大聲叫出母親的名咧?
 
< Prev   Next >