首頁 arrow 綠色短評 arrow 中國敢無幾個khah有頭殼的人?

中國敢無幾個khah有頭殼的人? PDF Print E-mail
Written by 李南衡   
Tuesday, 10 January 2017
2016年十二月初十,中國軍機koh一遍se̍h咱台灣週邊的空域演訓,日本出動兩台F15戰鬥機進行警戒,中國指控日本軍機對中國軍機進行近距離干擾、koh kā發射干擾彈。咱國國防部隨時下晡公布相關訊息。日本防衛廳hō͘咱真濟張足清楚的中國軍機相片,其中包括至少兩隻蘇愷30戰鬥機、兩隻轟六K轟炸機、一隻圖154電偵機、一隻運八電偵機,而且公布部分中國軍機的行徑路線,展現日本防衛省的情報掌控能力。 十二月十七,中國前南京軍區副司令、退役中將王洪光佇「2017年環球時報年會」表示,2020年以前(中國台灣)軍事衝突一定會發生,2020年前後會爆發台海戰爭,有可能一聲tio̍h kā台灣奪取起來。是按怎會按呢?伊有講出前題:台獨目前是台灣的主流民意,而且有愈來愈獨的傾向,koh現在有75%的台灣人無承認家己是中國人,koh過一代,全台灣無人會承認家己是中國人。伊m̄-nā罵台灣漢光演習是自娛自樂,甚至表示,假使兩岸真正交戰,大陸the̍h台灣的時間bē使用幾「工」來計算、tio̍h用幾「點鐘」來計算,伊koh講一定tio̍h tī一百點鐘內取嬴。伊提醒咱台灣tio̍h隨時準備好勢對付中國的侵略戰爭。 十二月二五,由中國解放軍航空母艦「遼寧號」為主的航艦編隊,進行跨海區的遠海,第一遍穿過第一島鏈,航行到西太平洋海域進行海空作戰訓練,咱軍方研判,遼寧號演訓後真有可能會se̍h過來台灣東部海域,經由巴士海峽到咱ADIZ防空識別區東部航行,去kah解放軍南海艦隊會合,佇南海操演。咱空軍花蓮基地兩隻F-16軍機真罕得暗時緊急起飛監控,顯示中國航空母艦暗時有轉向逼近咱東部外海。   中國戰機kah航空母艦按呢接近咱台灣東方海面kah空中,一來beh展示in有法度突破第一島鏈,二來威脅台灣in會tàng來到咱的後尾門。Che mā hō͘咱看出in無頭殼。慣勢過太平日子的台灣開始警覺,咱的國防力量有夠強來打擊侵犯的敵人無?咱的雄三飛彈敢無夠厲害無?美國日本m̄-nā派戰機kah軍艦進行警戒監控。一月初五美國派遣「卡爾文森號(USS Carl Vinson)航空母艦戰鬥群ùi美國西部出發,來kah西太平洋印度洋的盟友進行海上安全巡航任務。 咱講hit位中國前南京軍區副司令、退役中將王洪光會使講是中國無頭殼將軍的代表,伊講中國國國民黨是扶bē起的「阿斗」tio̍h好ah,何必罵講是無法度抹上壁的lo̍k-糊仔糜咧,咱台灣人mā無人罵中國國民黨罵kah chiah寫實!   講是大國強國,中國敢無幾個khah有頭殼的人?
 
< Prev   Next >