首頁 arrow 綠色短評 arrow 注意,匪諜佇你e5身邊!

注意,匪諜佇你e5身邊! PDF 列印 E-mail
2009/02/13, Friday
        台灣一寡學者及研究生真煩惱,inbe7曉,中國一寡in家己講e5學者,自了都m7 bat關心過台灣,ma7 m7 bat研究過台灣e5啥物,是按怎最近幾年一人寫一本成作歸套研究台灣e5專書?in e5用意是啥物?in敢是徛佇良性互動e5立場、作客觀深入e5學術研究?真濟中國in家己講e5學者,臨時臨iau7pong7pong7 beh出冊,一向對台灣完全生疏e5beh按怎才好?tioh8用偷用劫用搶,才無teh及你講啥物學術研究、學術良心咧!台灣真濟年輕學者e5著作,hou7中國一寡in家己講e5學者偷theh去用,準作in著作e5一部份。

        中國in家己講e5學者除了大量收集台灣相關e5冊以外,上蓋垃圾鬼是偷theh一寡大學研究生e5研究成果。咱台灣e5研究生,拼命收集資料,認真作分析整理,往往hou7 in 指導教師阿佬稱讚,認真拍拼原本就是少年人可貴可愛e5所在。中國一寡in家己講e5學者,會想盡辦法chhoe7台灣e5學者教授鬥相仝,探查看有to2一個研究所e5研究生teh做及伊想beh chhoe7 e5主題相關e5研究。奇怪,tioh8是有台灣e5學者會認真去chhoe7、用盡人際關係去討全部、抑是部分e5資料,提供hou7中國一寡in家己講e5學者使用。

  中國in家己講e5學者theh tioh8資料,完全無顧tioh8少年人苦心研究e5成果,抄抄變作伊家己e5學術成果。上可惡e5inbeh提起資料來源。假使有一位咱台灣e5台灣文學研究生,碩士論文是二00八年六月三十日通過,中國in家己講e5學者e5冊是仝年六月十五出版。內底有真濟段完全仝款,看tioh8咱台灣chit位研究生e5論文e5人攏會替台灣研究生感覺見笑,那會使歸段歸段抄中國學者e5koh無講出處?無論chit位研究生按怎解釋,人攏聽beh落去。那有可能中國名教授、博士生指導教師,會去抄台灣一個小小研究生e5論文?何況中國hit位學者e5ma7比你論文通過hit工早半個月出版!

  若拄tioh8 chit款情形,有影是beh哭無目屎!會tang3證明你清白e5只有你e5指導教授,問題是無可能四界去kang5說明?一位台灣研究生e5研究成果那會走去中國?原來是受中國學者拜託e5老師會chhoe7你,講對你寫e5論文、研究e5內容真有趣味,beh借看一下。你若古意tioh8印一份草稿送hit位老師。你就害ah!台灣真濟研究生e5研究成果變作中國in家己講e5學者e5著作,攏恬恬m7敢出聲,驚得失tioh8台灣學術界e5老前輩抑是老師。

  咱台灣話講hiah-e5老師是「內神通外鬼」。事實上,用早前中國國民黨喝幾十年「匪諜佇你e5身邊」e5口號ma7真合。注意,匪諜佇你e5身邊!

 
< 前一個   下一個 >