首頁 arrow 綠色短評 arrow 移民kah in子孫

移民kah in子孫 PDF 列印 E-mail
發表者 李南衡   
2017/01/16, Monday
最近有幾位「台美人」(佇美國的台灣人)轉來台灣,kah往年無仝,今年連子新婦、查某子子婿、內外孫攏總chhōa轉來,hō͘  in參觀認識阿公的故鄉。19501970年代去美國的留學生上苦讀,等到in the̍h tio̍h學位、chhōe tio̍h好頭路,chhōa某生子,生活漸漸安定落來,更深夜靜的時定定會懷念起故鄉台灣。慢慢有台灣人組織同鄉會連絡彼此的感情,若有台灣的政治人物去美國,各地相爭邀請去演講,聽最近島內的消息心頭tio̍h會一陣燒,作夥唱「黃昏的故鄉」目箍tio̍h會紅。In組織各種團體為台灣出聲、出力,上有名的“FAPA”會tàng影響到美國國會議員。總是chit群上優秀的留學移民會老,囝仔會大,第二代的「台美人」融入美國社會,生活習慣、思想觀念完全美國化,inchhōa的對象五花十色。第三代koh khah免講,會曉用台語叫阿公阿媽,你tio̍h偷笑。 中國歷來戰亂的時間比太平的時間khah濟,沿海各省的人民生活困難,加上沿海的人khah有冒險精神,福建廣東兩省真濟人移民去南洋,chit群討趁移民經過一代兩代三代的勤儉拍拚粒積,有小可成就有一寡資產,當地人看了目孔赤。以印尼、馬來西亞作例,有已經移民三四代猶無beh學當地的語言、叫當地人「番子」、罵bē曉講華語(無管是河洛話、客語、福清話)的華人子弟「峇峇」(bâ-bâ);有大選的時好額的華人一定走閃去新加坡、香港,選舉了才轉去。無論叼一旁選嬴,伊攏去向伊祝賀,因為大選前伊兩旁攏有teh、金額當然無平大注,而且絕對無hō͘另外hit旁知。但是社會上若有任何小小的動亂,當地華人所開的商店一定頭一個tio̍h災,hông搶hông燒hông拍,一般叫作「反華」。   但是,以廣東潮洲人為主的泰國移民,in踏tio̍h泰國的土地隨時「入境隨俗」,改泰國人的姓名、學泰國話,過泰國生活。泰國歷史上有幾位總理若照血統來講是華人,但是in bē講起mā無人會問,因為in完全融入泰國社會,in是泰國人。你敢bat聽過泰國tang時仔「反華」過?無。   舊年總統大選,罵咱台灣人是「皇民後代」的郝柏村將軍,怨歎伊的外孫女講伊家己是台灣人。真濟人原本tòa佇台灣的少年人、kah所謂「外省人」第三代成作「自然獨」,因為in融入佇台灣社會。像郝柏村將軍chit種人自認為是懸人一等的統治者,bē記得in是走路來台灣的戰亂移民,in無beh融入台灣社會是「夯枷」家己痛苦niā-niā,那像南洋tòa三四代猶bē-giàn講當地話的老華僑。   台灣是一個移民社會,包容性相當大,若認同台灣、疼惜台灣,無論啥物款人咱to̍h伸雙手kā歡迎!
 
< 前一個   下一個 >