首頁 arrow 綠色短評 arrow 製造出來的新聞kah事實有增差!

製造出來的新聞kah事實有增差! PDF 列印 E-mail
發表者 李南衡   
2017/01/26, Thursday
一月初七,蔡英文總統啟程展開九日八暝的「英捷專案」,去中美洲四個友邦國家訪問。出門進前,有人提起前總統馬英九早前出訪的時,bat hō͘尼加拉瓜總統奧蒂嘉放五遍粉鳥:2009年,馬英九前總統去友邦薩爾瓦多參加新任總統就職典禮,佇hiakah奧蒂嘉相約三遍,攏hō͘伊放粉鳥。後來馬前總統親身訪問尼加拉瓜的時,奧蒂嘉講beh去接機又koh無去,設晚宴款待馬前總統,奧蒂嘉總統本人無出席,表示beh去飯店向馬前總統說明hoe失禮、又koh無去。最後當時駐尼加拉瓜大使吳進木放調,奧蒂嘉若無出現,tio̍h beh取消兩國所有的合作計劃,奧蒂嘉最後才出現。一位涉外人士表示,宏都拉斯kah尼加拉瓜兩國有危機,特別是奧蒂嘉非常「奸鬼」,佇小細節頂面會「變孔」,蔡總統tio̍h小心注意。甚至有人講中國會chhōe機會創孔,雖然外交部一再表示:Chit四個邦交國家攏無問題,總是網路頂面五花十色的謠言一直無斷過。 一月初九,蔡英文總統到中美洲訪問的頭一個國家宏都拉斯,到位的時當teh落雨,宏都拉斯副總統阿華黎(Alvarez)徛佇紅地毯的hit頭等待歡迎接機。宏都拉斯足少落雨,真歡喜拄tio̍h落雨,蔡總統講「拄tio̍h水一定會發!」宏都拉斯kah咱建交有七十五年久,蔡英文總統kah賀南德總統有針對提升兩國雙邊關係、共同關切的議題,深入交換意見,而且見證兩國重要合作計劃的執行成果。Hō͘蔡英文總統感受tio̍h宏都拉斯深厚的情誼,kah中美洲滿滿的熱情。   一月初九黃昏暗,蔡英文總統飛到尼加拉瓜,暗時kah奧蒂嘉總統會面,進行雙邊會談。一月初十尼加拉瓜總統就職大典,總統奧蒂嘉kah總統夫人副總統穆利優(Murillo)坐中央,蔡英文總統坐佇in正旁的大位,koh過去是玻利維亞總統莫拉萊斯(Morales)、薩爾瓦多總統山齊斯(Sanchez)。奧蒂嘉總統就職演講講到經濟的時,特別介紹台灣共和國蔡英文總統,蔡總統緊徛起來接受尼加拉瓜人民的掌聲。佇演講中,奧蒂嘉總統稱呼蔡英文總統是伊的姐妹。   製造出來的新聞,大部分是「有關人士」、「高層人士」抑是「權威人士」無名無姓的人講的,免負責。新聞內容有兩三分事實tio̍h落去pòng大、落去推理。當然kah事實會有增差。中國的《環球新聞》一下講beh kā咱的邦交國家「剃光頭」無留半個,新聞製作工廠tio̍h講蔡總統出訪中美洲的時有兩個國家邦交危險;因為馬英九前總統早前bat hō͘奧蒂嘉總統放五遍粉鳥,無去追查是啥原因,tio̍h製造新聞講奧蒂嘉非常「奸鬼」。若是按呢,那會對蔡總統hiah親切咧?   事實上,咱攏看會出來,製造出來的新聞kah事實有增差!
 
< 前一個   下一個 >