首頁 arrow 綠色短評 arrow 香港新聞媒體的新出路

香港新聞媒體的新出路 PDF Print E-mail
Written by 李南衡   
Friday, 03 February 2017
最近一年外香港出現幾個新的新聞媒體,kah以往逐個所熟似的報紙雜誌電台電視無仝的網路媒體,但是,koh kah原本佇網硌頂面tio̍h已經有的免費網路新聞媒體無仝的是tio̍h付費,che有可能是香港新聞媒體的新出路。 看tio̍h chit種新聞媒體的出現,人一定會有兩個疑問。第一,是按怎會有chit種新聞媒體?因為chit幾年來一直有報紙停刊、雜誌社收攤,也就是「紙本」的新聞媒體漸漸進入黃昏暗,歸個媒體的傳播方式已經無仝款ah!用電腦、手機仔看新聞chhōe資料得智識是新的趨勢。另外一個足重要的原因是香港的新聞自由一年一年倒退,若照「無國界記者組織」所做的全球新聞自由指數,香港的新聞自由,2002年佇全世界139國中排第18名、算是前段班,可惜年年落,落到2014年佇180國中排第61名、2016年佇180國中排第69名,若kah台灣比tio̍hkoh-khah看會出差別,2002年台灣佇139國中排第35名、2014年佇180國中排第50名、2016年佇180國中排第51名,是亞洲的第一名。香港的新聞自由倒退主要原因是中國佇後壁變鬼變怪,像講《明報》前總編輯劉進圖忽然間hông換掉、一個月後hông刣六刀倒佇路邊,破案才知兇手是中國來的烏道。像講英文《南華早報》hō͘中國阿里巴巴買去,其他手法猶有用廣告控制輿論。一寡新聞界前輩煩惱香港新聞自由的前途,離開報社雜誌社出來辦一份《眾新聞》,募款募tio̍h五百萬港幣,有三千三百個香港人支持,自信會提出「值得人付錢的內容」,會贊助「公民記者」去進行深入的報導。《傳真社》kah「眾新聞」仝款用「大眾籌資」的方式,一聲tio̍h籌有四百外萬港幣,in強調in m̄是報社,是一個通訊社,beh提供公共、不偏不倚,準確的調查報導hō͘各種媒體,目標是beh作世界第四大通訊社。伊第一砲拍響的是報導香港政府扣留新加坡的裝甲車,差不多每一個媒體攏隨時轉載。另外一間是英文報HKFP(香港自由報),佇香港上有影響力的英文報紙已經染紅去ah!為tio̍h香港的新聞自由,一份英文傳播媒體確實有伊的必要性,會tàng hō͘全世界看tio̍h真正的香港。   咱看香港新聞界前輩為tio̍h香港的新聞自由按呢teh拍拚,除了欽佩以外mā tio̍h加倍寶惜台灣的新聞自由會tàng佇亞洲排第一名。「無國界記者」美國事務處負責人哈干(Delphine Hargand)擔心,新聞自由佇全世界排名第176名(尾溜算倒轉來第五名)的中國,會用各種方法來影響台灣的新聞自由,而且是愈來愈深愈濶,逼媒體頭家改變態度、用廣告牽制新聞內容。伊煩惱台灣的新聞自由有一工若親像香港按呢,新聞自由無死mā半條命!台灣人你敢bē驚bē煩惱?
 
< Prev   Next >