首頁 arrow 綠色短評 arrow 期待緊kā台灣的肥貓清除掉!

期待緊kā台灣的肥貓清除掉! PDF Print E-mail
Written by 李南衡   
Friday, 10 February 2017
2008年金融海漲(chú-ná-mih)了後,「肥貓」煞忽然間名聲大響。原來是美國智庫「政策研究所」發布一份報告,指出接受美國政府緊急救援的二十間銀行CEO(執行長)的薪資,比500間大公司CEO平均年薪(約1000萬美元)懸37%,媒體kā in號名叫作「肥貓」。就是講,有接受政府捐助的機關團體,雖然經營不善,但是高層的經理人抑是董監事,卻領比一般行情的薪資、紅利kah福利懸真濟,hit種人叫作「肥貓」,因為油洗洗、已經肥kah曉掠貓鼠ah 台灣若有肥貓m̄知bih佇叼位?政府每年開2,126億捐助164個財團法人,chiah-ê財團法人有的是公益慈善性質的、有的是科技研發抑是行政協助型的。但是一寡業務屬性的,應該訂一個自籌財源的比率kah每年成長的目標,做無到的抑是成效無好的,應該減少抑是停止經費捐助。但是真失禮,照南台科技大學財經法律所羅承宗教授所講的:過去八年完全執政的中國國民黨政府kā「財團法人法」草案冷凍起來,致使一直無法thang管in,肥貓tio̍h按呢繼續生存落來。   經濟部、科技部、衛福部、文化部kah農委會等五個部會所屬的財團法人佔政府捐肋金額的八成以上。民進黨立委余宛如bat piak空講,農委會管轄的財團法人幾位董事kah經理人月薪幾十萬,無看tio̍h營運績效,每年開十外億。《鏡傳媒》報導,血液基金會執行長張英二,伊本身猶有teh領台灣省政府衛生處副處長退休俸,每個月koh ùi血液基金會領薪水加特支公關費二十外萬,Kah伊仝款公務人員退休了koh去財團法人領高薪的,四界to̍h有。    中央各部會那會捐助設立hiah濟財團法人咧?其中一個原因是,設立一個kah伊本人抑是kah伊下面營利機構業務相關的財團法人,等原職退休了隨時去某一個財團法人擔任高級主管,隨時變作一隻油洗洗的「肥貓」。   2016年十一月二一,蔡英文總統召開執政決策協調會議,有提起政府捐助成立的財團法人,要求行政院各部會tī一個月內清查所屬財團法人現況、統一檢討,koh請行政院tī年底進前提出「財團法人法」草案。蔡總統有注意tio̍h chit-ê政府捐助成立的財團法人是一孔烏-lang-lang,mā知影解決chit-ê問題的迫切性,才會要求hiah嚴。咱應該kā蔡英文總統拍噗仔、大聲喝「贊!」   問題是「一個月內」的十二月二十已經過了,行政院各部會m̄知有清查好勢、統一檢討了抑未?「2016年底」mā已經過月外日ah,行政院的「財團法人法」草案m̄知提出抑未?干單政府才知影台灣的肥貓佇叼位,咱真期待緊kā台灣肥貓掠出來清除掉。若無,蔡英文總統的主人-台灣人會受氣o͘! 
 
< Prev   Next >