首頁 arrow 綠色短評 arrow 怪來怪去tio̍h怪馬英九!

怪來怪去tio̍h怪馬英九! PDF 列印 E-mail
發表者 李南衡   
2017/02/16, Thursday
二月十一,前總統馬英九出席中華人權協會會員大會,演講「近年台灣人權議題-保障人權tio̍h靠法制」,佇演講中砲轟「不當黨產處理委員會」hāⁿ過行政、立法、司法三權,有違反憲法的疑義,koh批評訂定《不當黨產處理條例》有違反法律不溯及既往、無罪推定、禁止個案立法、法律內容應該具體明確、一事不再審理、利益衝突等上基本的法治國的原則。 既然chiah嚴重,馬英九前總統那會bē曉去聲請釋憲?   有一位年輕女性mo-dé-luh林若亞,不服國稅局認定伊的收入是薪資所得bē-tàng列舉扣除,伊去聲請釋憲。二月初八,大法官會議認定國稅局違憲,伊嬴。無采馬英九前總統台灣大學法律系畢業、美國哈佛大學法學博士,khah輸一個年輕女性mo-dé-luh!   上好笑的是舊年八月十九,中國國民黨主席洪秀柱邀請歷任黨主席連戰、吳伯雄、馬英九kah朱立倫去討論黨產議題,中國國民黨文傳會主委周志偉tī會後轉述講,馬英九認為黨產條例爭議真大,建議向國際媒體發聲。   咱實在足期待中國國民黨趕緊向國際媒體發聲,看in按怎掀臭尻川hō͘全世界的人看,看通世界上好額的中國國民黨的黨產是按怎烏來的!   馬英九前總統有可能bē記得伊bat作過兩遍中國國民黨主席,2005年八月十九當選中國國民黨主席,為tio̍h 2008年總統大選,tī就任演說的時,提出明確的黨產「處理時間表」,強調黨產問題一定tio̍h tī 2008年進前清除完畢。原則上,有爭議的部分靜待司法解決,無爭議的會依法賣掉、信託抑是捐送出去。賣出黨產所得,會優先作安置退休、離職同仁的路用。幾年過去無做半項,2009年十月koh再當選中國國民黨主席,就職演講koh再對黨產發表談話講,tio̍h盡速處理黨產,黨產佇歷任主席的努力之下,處理kah chhun最後一里路。干單chhun一寡已經交付信託的中央投資公司一項黨營事業。伊講「英九保證今年底進前,阮會the̍h出黨產處理上路尾的方案,佇處分中央投資公司了後,除了保留黨工離退職金kah黨務運作發展經費以外,所chhun的會捐作公益之用,本黨未來競選經費會以募款為主,本黨未來bē koh經營任何營利事業。」   馬英九若照伊兩遍黨主席就任所講的去做,中國國民黨的黨產早tio̍h清氣溜溜ah,那有今仔日的「不當黨產處理委員會」kah《不當黨產處理條例》咧?現任中國國民黨主席洪秀柱mā無可能佇hia哀父叫母講人beh kā in「抄家滅族」。   怪來怪去tio̍h怪馬英九!
 
< 前一個   下一個 >