首頁 arrow 綠色短評 arrow 陳庚金只不過講出中國國民黨的本質

陳庚金只不過講出中國國民黨的本質 PDF 列印 E-mail
發表者 李南衡   
2017/03/01, Wednesday
二月十六,為反對年金改革,全國公教軍警kah退休人員聯合總會會員大會,陳庚金佇演講中呼籲『所有現職軍公教人員「能撈就撈」(意思是講:會tàng貪諾濟tio̍h kā貪諾濟)、「能混就混」(意思是講:tàng按怎死坐活食tioh kā按怎死坐活食),逐個來政府拖hō͘倒!』引起真濟人的不滿kah受氣,有人指責伊是教唆公務人員貪污;有人罵伊是煽動公務人員叛亂;有人講陳庚金真老實講出中國國民黨的本質,若無,中國國民黨政府那會hông踼出中國境外;有人講一個bat做過「人事行政局局長」-管理全國公務人員人事上懸的官員、kah「考試院考選部次長」-全國公務人員考選的上懸機關副首長的人,那會使講chit種話咧?伊敢知影2010年考試院公布的《公務人員服務守則》起頭tio̍h講:「為tio̍h期待公務人員執行職務的時,秉持廉正、忠誠、專業、效能、關懷五大原則,以型塑優質組織文化,建立廉能服務團隊,特定本守則」。第一條tio̍h講,「公務人員應該廉潔自持,主動利益迴避,適當處理公務kah有效運用公務資源kah公共財產,以建立廉能政府。」陳庚金明明是teh敎歹公務人員。 伊會講chit款話,一點仔都無奇怪。因為伊bat作過中國國民黨政府的大官,而且現在koh是「中國國民黨中評會主席團主席」。咱知影,見若bak tio̍h「中國」chit兩字的tio̍h kah「貪污」剥bē離,中國現代經濟學家、馬克思《資本論》中文本翻譯者王亞南教授,佇伊的大作《中國官僚政治研究》中講:「中國一部二四史,其實tio̍h是一部貪污史。」想想mā有影,中國五千年歷史若beh講無貪污的清官,khah講mā講hit-ê 兩千年前佇東萊作太守的楊震,有一暗王密縣長the̍h十斤黃金來hō͘伊,楊震隨時kā拒絕。王密講三更半暝無人知、the̍h無緊,楊震真受氣講:「天知地知你知我知,那會講無人知!」   中國過去三十年攏總有四百二十外萬個黨政人員受tio̍h處分,其中有四百六十五人是省部級大官,包括身為中共中央政治局委員陳希同、陳宇良、薄熙來kah已經退休的前中央政治局委員周永康、郭伯雄、徐才厚等。1988年至2002年的十五年,貪污hut去外國的錢攏總有一千九百十三億五千七百萬美金。中國領導者習近平上台以來大力推動「反腐肅貪」,你看敢有效?五千年的貪污那像in中國血統的一部分,無法度斷根除清。   中國國民黨kah中國共產黨是一對無sêng免錢的雙生兄弟。Ùi中國國民黨大官陳庚金的講話,hō͘咱koh khah堅定主張,稱呼in「國民黨」無夠氣,一定tio̍h愛稱呼in「中國國民黨」才有tio̍h味!
 
< 前一個   下一個 >