首頁 arrow 綠色短評 arrow 等豬仔刣死才beh講價!

等豬仔刣死才beh講價! PDF 列印 E-mail
2009/02/20, Friday
        台灣馬英九政府一直想beh及中國簽一個經濟合作協議,因為早前中國中央政府有及香港簽一個「koh khah e5經濟安排」(Closer Economic Partnership Arrangement, 簡稱CEPA),主要內容是:兩地實現貨物貿易完全無關稅,擴大服務貿易市場准入,實行貿易投資便利化,ui3二00四年一月初一開始實施。Chit-e5協議e5重點,是beh hou7中國國家主體及伊e5特別行政區之間e5經貿聯繫koh-khah密、koh-khah緊。in真正e5目的是:祖國大陸、香港、澳門及台灣,建構一個「大中華經濟圈」e5起點。

        馬英九政府一下開嘴,人就看tioh8e5嚨喉蒂仔。逐個ma7攏真清楚伊想beh變啥物bang2,所以伊就緊發明一個新名詞叫作「綜合性經濟合作協議」(Comprehensive Economic Cooperation Agreement,簡稱CECA),強辯講,「洗拍」(CEPA)及「洗腳」(CECA),雖然第一字英文字母C及第四字英文字母A是仝款,但是意思完全無仝。內容到底有啥物無仝?若是簽「自由貿易協定」(FTA)m7是足清楚?be7使簽ma7 m7敢簽,因為「自由貿易協定」是國對國e5 關係。若按呢簽「洗腳」(CECA)是啥物及啥物e5關係?

中國商務部副部長姜增偉講,兩岸應該努力建構經濟合作制度e5安排,盡早簽署類似CEPA e5協議。無loa7久,中國發現馬英九政府若提出behCEPA,馬上tioh8 hong5罵講是beh ka7台灣捒去hou7中國,變作中國e5一個特別區。所以,中國ma7希望台灣會tang3趕緊想出一個無仝e5標仔來貼佇仝一罐毒藥罐仔頂面。中國官員講:tioh8按怎建立一個類似CECA,有CEPA之實、無CEPA之名e5協議。in按呢有夠清楚無?

二000年發明「九二共識,一中各表」hit-e5蘇起,今仔日是馬政府國安會秘書長,伊ti7二月十三講:兩岸未來簽署「洗腳」CECA(綜合性經濟合作協議)政策已經定調,一定會按呢做!台灣陸委會副主委傅棟成講,有可能性先簽訂一個「框架」起來。咱khah關心e5 m7是啥款e5框架,是框架內底e5內容。傅棟成講,雖然及大陸簽署綜合性經濟合作協議是既定e5政策,不過chit陣猶m7是說明內容e5時機。馬政府一再強調及中國簽chit-e5「洗腳」(CECA)是對台灣偌呢好對偌呢好,既然對台灣hiah呢好e5代誌,應該趕緊hou7全民知影才tioh8,那會按呢掩掩掖掖咧?是m7是協定內容有牽涉tioh8 啥物be7見眾、抑是頭殼隨在人刴e5賣台行為?

台灣人啊!等豬仔刣死才beh講價,beh哭都無目屎哦!

 
< 前一個   下一個 >