首頁 arrow 綠色短評 arrow 用馬英九的話塞馬英九的嘴!

用馬英九的話塞馬英九的嘴! PDF Print E-mail
Written by 李南衡   
Monday, 20 March 2017
三月十四早起,台北地檢署偵結前總統涉洩密案,認定馬英九當時洩漏猶teh偵查中的秘密事項,照「違反通訊保障kah監察法」等三項罪名伊起訴。下晡,馬英九佇出席台灣大學活動的時表示:「Chit-ê顯示關說司法個案的立委無代誌,但是處理司法關說醜聞的煞hông起訴,che真正是公理何在?我一定會為公理奮鬥到底。」馬英九講,當初司法總長向伊報告的時,伊認為chit件案件牽涉tio̍h高層級立委kah相關部會,「關說」一旦piak孔,會變作「世界級的醜聞」。 干單聽檢察總長黃世銘講,ùi監聽立法院長王金平kah民進黨立委柯建銘的電話,那像有teh kah法務部長chhiâu代誌,有涉嫌司法關說。「看tio̍h影生一個子」,馬英九「龍心大喜」,想講:Chit聲hō͘我掠tio̍h ah,看你王金平beh走叼去!Thàn王金平院長出國參加查某子婚禮無佇國內,召開記者會大聲罵講:「Che若m̄是關說,啥物才叫作關說?」Beh用開除黨籍的手段,hō͘王金平失去不分區立委身份,當然tio̍h bē tàng作院長,消去心頭大恨。問題是有「關說」抑無都猶m̄知影,臭名聲已經透到美國京城,《華盛頓郵報》報導台灣總統馬英九kah檢察總長黃世銘鬥孔,用偷錄音的電話beh ián倒仝黨的國會議長,講che是「台灣的水門事件」,真正是「世界級的醜聞」。勞煩tio̍h當時的駐美代表金溥聰回kah陪,向美國媒體解說講:「Che m̄是一個違法的監聽案,特偵組有法院許可針對一個刑事案件的監聽,做出行政違法的結案,台灣並無某一寡人所講的水門案。」   金溥聰代表講chiah-ê是加落氣niā-niā,因為「監聽」舞到路尾,才發現特偵組竟然偷錄音立法院的總機,意思是講所有立法委員的電話攏hō͘特偵組「監聽」去ah,連中國國民黨的立法委員mā擋bē-tiâu氣屁面起來。偵察組偷錄音國會總機,che才是百分之百的「世界級的醜聞」。路尾查了根本無啥物「關說」。   馬英九問講:「公理何在?」阮才beh問你咧!借問一下,特偵組是用啥物罪名kā阿扁前總統掠去關?馬英九就任了的2008年十一月十一,特偵組以「國務機要費」貪汙被告身份傳訊阿扁前總統,偵訊五點鐘了後,向台北地方法院聲請羈押阿扁前總統。了後才chhōe孔chhōe縫用別的案判伊有罪,「國務機要費案」初審判無期,二審改判二十年有期徒刑,等2010年十二月初二移送去台北監獄服刑九個月後的2011年八月二六,三審才判無罪定讞。用「國務機要費」貪汙的罪名掠阿扁前總統去羈押,結果是無罪,兩年九個月敢m̄是關假的?馬英九有幾十條案纒身目前才兩個案起訴,伊無hông羈押,會tàng出國去馬來西亞、去美國,台灣四界走,那像是無事人、誠輕鬆。Che才是真正的「公理何在?」
 
< Prev   Next >