首頁 arrow 綠色短評 arrow 「一個中國」早tio̍h無適用佇台灣!

「一個中國」早tio̍h無適用佇台灣! PDF Print E-mail
Written by 李南衡   
Friday, 24 March 2017

三月十八新聞報導,美國在台協會(AIT)前理事主席卜睿哲今年香港回歸中國二十週年,出版一本《中國陰影下的香港》,分析香港回歸了後的種種變化。伊提起,因為北京政府的強勢政治手段,佇香港無法度實施真普選,香港人對「一國兩制」漸漸失去信心,chiah-ê變化,台灣人攏看在眼內。一個有主權實體的台灣kah香港的地位完全無仝,加上chit種排除異己的制度,佇台灣是完全無任何市場抑是吸引力。卜睿哲分析講,北京不斷對香港kah台灣推動「一國兩制」的原因,就是in無瞭解家己創造的制度造成政治疏離,想講一直少年人講in的制度偌呢好,大眾早慢tio̍h會改變想法。伊講:「Chit種情形發生。」

誠抵好,提供專業國際時事分析kah評論的《經濟學人》taⁿ-á發表一篇評論「一中的巨大混亂」強調「一中」早tio̍h霧霧無清去ah!無適用佇台灣,因為中國、美國、台灣三方面根本tio̍h是隨人講家己的話。中國長期以來一直kā台灣看作是一個叛亂省,但是馬習會、抑是美國軍售台灣等等來作例,說明中國mā是放目準作無看tio̍h。上簡單的解決辦法tio̍h是承認世界有「兩個中國」。   咱代先來瞭解「一個中國」chit句話是按怎來的?四十五前的1972年,美國總統尼克森應中國政府邀請,猶未建交的雙方政府佇上海簽訂《中美聯合公報》,簡稱《上海公報》,雙方講家己的立場。中國重申中華人民共和國是中國唯一合法的政府;台灣是中國的一省;解放台灣是中國的内政,别國無權干涉;美國武裝力量kah軍事設施tio̍h全部ùi台灣撤出;堅決反對「一中一台」、「台灣獨立」等活動。美方聲明:美國認識tio̍h佇台灣海峽兩旁的所有中國人攏認爲只有一個中國,台灣是中國的一部分。對chit點美方bē提出異議,而且確認最後目標是ùi台灣撤出全部的美國武裝力量kah軍事設施。   四十五年前的台灣統治者是中國國民黨的蔣介石,當時台灣人是佇白色恐怖下面過日,啥人敢hng一聲?三十年前的1987年,全世界實施上久、佇台灣有三十八年久的戒嚴令解除,台灣人才慢慢tháu放,才慢慢敢表達家己的想法。四十五年前的台灣人siáng敢講伊m̄是中國人?時代已經無仝,二十一年前的1996年,佇台灣自認為是台灣人的比率是44%;十一年前的2006年變作55%;舊年的2016年升到73%。相對的,今仔日佇台灣自認為家己是中國人的干單11% niā-niā。公報中美國聲明的是「佇台灣海峽兩旁的所有中國人攏認爲只有一個中國,台灣是中國的一部分。」今仔日佇台灣共有11%的中國人無權利代表另外89%的台灣人。「一個中國」當然早tio̍h無適用佇台灣!
 
< Prev   Next >