首頁 arrow 綠色短評 arrow 好山好水,mā-tio̍h愛有好心好行的人!

好山好水,mā-tio̍h愛有好心好行的人! PDF Print E-mail
Written by 李南衡   
Friday, 31 March 2017
人講花蓮是一個好山好水的所在。但是你若去太魯閣國家公園入口前的亞洲水泥礦區-新城、秀林的好山,已經hôngkah臭頭爛耳、淒慘落魄去ah 亞洲水泥是1973年獲准承受礦業權,礦區面積442公頃、礦權二十年。Tī chit中間的1986年,太魯閣國家公園成立,有將礦區中的25公頃劃入國家公園特別景觀區。1994年二十年期間到,亞洲水泥申請續組,竟然連劃佇國家公園內的25公頃mā beh繼續承租,khah意外的是竟然有hit號無「好心好行」當時的內政部長吳伯雄kah行政院長連戰、tī 1995年准in繼續租用,而且無kā劃定公告作礦業禁採區。實在可惡!歸個礦區續租的期限今年十一月二二期滿。亞洲水泥舊年十一月向經濟部提出申請礦權展延二十年,今年三月十四批准通過。     三月二十,高志鵬立委召開經濟委員會檢討礦業法,會中通過「經濟部半年內暫停核可礦權展延」的臨時提案,避免業者渡tī修法前強偷the̍h tio̍h koh一個二十年久的礦權展延。無人想會到,經濟部礦務局卻tī in去立法院報告前的三月十四火速通過亞洲水泥佇花蓮縣399公頃的大理石礦權展延二十年。環保團體kah立法委員召開記者會批評,而且發起連署要求徹銷亞洲水泥展延,已經有六七十個民間團體連署。   經濟部長李世光講,亞洲水泥佇花蓮縣礦權展延案一切依法行政、依法核可,而且會勘單位mā攏無異議。真歹勢,林淑芬立委講伊有調閱公文,內底有三個單位包括農委會水土保持局、花蓮縣政府kah花蓮縣文化局攏有反對意見。啥人講白賊,公文the̍h出來看敢m̄是tio̍h一清二楚?林淑芬立委質疑經濟部三月二十佇立法院,是按怎「Bē記得kā立委講亞洲水泥恁管bē-tio̍h ah,經濟部已經kā通過展延了ah!」經濟部是m̄是teh kā立法委員裝siáu-ê?   經濟部長李世光講若是撤銷批准,亞洲水泥會申請國家賠償。林淑芬立委kah高志鵬立委提案,要求經濟部撤銷三月十四通過亞洲水泥的花蓮礦場礦權展延的許可,tio̍h照礦業法第28條「主管機關認為設定礦業權有防害公益者,不予核准。」kah原住民基本法第21條「政府或者是私人佇原住民族土地抑是部落kah周邊一定範圍內的公有土地從事土地開發、資源利用、生態保育抑是學術研究,應該諮商而且取得原住民族抑是部落同意或者是參與,原住民會tàng分享相關利益。」若是有違反相關規定,tio̍h會使撤銷抑是廢止展限許可。   代誌會有啥款的結局,tio̍h看「好心好行的人」khah濟抑是khah少。若是khah少,好山好水mā會變作臭頭山惡水!
 
< Prev   Next >