首頁 arrow 綠色短評 arrow 自由m̄是天落落來的!

自由m̄是天落落來的! PDF Print E-mail
Written by 李南衡   
Monday, 10 April 2017

舊年(2016)十一月底,行政院宣布每年四月初七作「言論自由日」,是紀念1989年四月初七,鄭南榕為tio̍h主張言論百分之百自由,佇伊的雜誌社總編輯室點火自焚。台灣雖然1987年七月十五實施三十八年koh五十六工的戒嚴令解除了ah,但是中國國民黨政府猶(iáu)相當壓制人民對自由思想的追求。一直追求百分之百言論自由的鄭南榕,1989年佇伊的雜誌刊登台灣獨立建國聯盟主席許世楷所寫的《台灣共和國憲法草案》,中國國民黨政府以涉嫌叛亂的罪名傳喚伊出庭,鄭南榕為tio̍h表達百分之百的言論自由,拒絕hō͘警方逮捕。伊認為台灣獨立的主張是言論自由的一部分。所以伊宣布:「中國國民黨政府bē-tàngtio̍h我,干單會tàngtio̍h我的屍體。」而後家己關佇《自由時代周刊》雜誌社內底,而且佇辦公桌仔下面準備汽油桶表示伊抵抗到死的決心。四月初七透早,警方向雜誌社發動攻堅行動,bē-giàn hông掠的鄭南榕入去辦公室點to̍h汽油自焚死亡。伊的死影響koh-khah濟人決心追求百分之百言論自由,甚至影響到二十五年後青年學生發動的「日頭花運動」。

一個國家的新聞自由,kah人民是m̄是拚勢爭取有真大的關係,但是政府的影響力koh-khah大。阿扁總統執政時期,台灣新聞自由佇世界一百八十國排名第三十二名,馬英九總統執政了的第二年落到四十三名,一直落到第四十七、八名。民主指數,阿扁總統執政的時是世界第三十二、三名,馬英九總統執政的時退步到世界第三十七、八名。期待蔡英文總統執政會tàng一年一年進步。   咱講言論自由比較khah強調講話、著作(包括發表評論、寫冊、寫歌作詞、畫圖)的自由,bē因為執政者對一個人所發表的內容無歡喜,煞kā禁、甚至kā人掠去關、掠去刑,甚至kā piāng掉。其實新聞自由mā包括沈默(恬恬m̄講話)的自由。但是咱hit-ê歹厝邊中國,kā in人民的言論自由管死死猶bē煞,lah-sap手伸入來咱台灣,逼一寡藝人、企業家tio̍h表態講:中國干單一個niā-niā,台灣是中國不可分割的一部分,koh tio̍h講家己是中國人。若無照in的意思講話,in tio̍h封殺台商佇中國的經營,禁止藝人去中國表演。上新的àu步已經先佇香港試驗,新聞媒體若無照中國的意思講話、抑是發表一寡中國無合意的言論,中國會壓迫in影響會tio̍h的廠商,禁止佇無合中國意思的媒體廣告,用經濟力封鎖言論自由。若是有效果,當然會仝款佇台灣封殺新聞媒體,看啥人敢m̄順從in-ê意思?Che tio̍h看咱台灣的媒體kah台灣人有覺醒無、有志氣無。   言論自由kah平等、人權,攏m̄是天落落來(lak- -lo̍h--lâi)的。
 
< Prev   Next >