首頁 arrow 綠色短評 arrow In攏總是賊!

In攏總是賊! PDF Print E-mail
Written by 李南衡   
Tuesday, 02 May 2017
四月二五,立法院三讀通過「公職人員年資併社團專職人員年資計發退離給與處理條例」,已經延續半世紀的「黨職併公職」的問題解決掉。那會拖hiah久?因為民進黨的立法委員一直攏比較khah少,有人提案,佇立法院的委員會tio̍h hông封殺掉,根本無機會去到大會討論。好佳哉舊年底立法委員改選,民進黨一聲增加二八席,the̍h tio̍h六十八席佔六成,變作第一大黨;原本有六十四席的中國國民黨輸kah chhun三十五席,猶無夠三分之一席次。當然,chit遍立法院中國國民黨黨團知影家己情理輸人,無認真反對才會順利完成三讀。 目前猶有三百八十一人併計黨職年資作公職年資,其中政務官有十一人、公務人員一百九十五人、教育人員一百七十五人,併計年資佔大部分的是一年至五年有二百零三人、五年至十年的有一百零九人、超過十年的有四十八人,已經過身去的領取者有一百八十八人,其中有六十人由遺族改領月撫慰金,無beh追究。代誌會舞kah chiah大孔,主要是考試院ùi 1969年至1985年四遍kā中國國民黨相關機構員工的年資採計作公職年資,句括「中國青年反共救國團」、「中國大陸災胞救濟總會」、「世盟」、「亞盟」、「革命實踐研究院」、「中華民國民眾服務總社」、「三民主義大同盟」等單位。其中上大宗的「中華民國民眾服務總社」(其實tio̍h是中國國民黨)有二百七十一人,包括連戰、吳伯雄攏bat作過該社主任。上蓋hàm的是胡志強,伊去英國留學的時作該社連絡員、而後作書記攏總有十年的黨職併公職。代誌是一直到1985年監察院調查報告講按呢是違背憲法的平等原則,要求修正。1987年十二月初三考試院才決議終止併計黨職年資。   Chit-ê條例通過關係tio̍h早前黨職併公職的人幾個問題,第一,若是扣掉黨職併公職年資,對已經退休了的人重新核算年資,有真濟人會致變作退休年資無夠,bē-tàng領月退。第二,扣掉黨職併公職年資,以前所加kâng領去的退休金,原本核發機關應該tī一年內要求所屬社團提出來還;政務人員的部分,會使直接向領受人要求。若是拒絕還chit條錢,隨時會tàng進行追繳。   有人講黨庫通國庫,那像是中國國民黨佇國庫開一條大圳通黨庫,水閘一下開,國庫的財產tio̍h直直流過去黨庫。行政院黨產會tio̍h是beh清算中國國民黨所霸佔去的國庫財產,攏tio̍h吐出來還國庫;Chit遍立法院所通過清算「黨職併公職」的條例,那像是中國國民黨的一寡大細粒黨官,每人ùi國庫牽一條大細條水管去in厝,所以要求in kā今仔日以前所吞食去的攏總吐出來還國庫,按呢tio̍h有三億。Hō͘人忽然間想起美國杜魯門總統罵蔣介石講:「In攏總是賊!」
 
< Prev   Next >