首頁 arrow 綠色短評 arrow 期待看tio̍h無中國國民黨的台灣!

期待看tio̍h無中國國民黨的台灣! PDF Print E-mail
Written by 李南衡   
Monday, 08 May 2017
今年(2017)初,中國國民黨黨員只有25萬人,為tio̍h今年五月二十beh選黨主席,有人拍拚去giú人入黨,無四個月,黨員增加到478千、增加91%,相當驚人!中國國民黨新選出來的黨主席若隨時宣布,此後每年攏beh改選黨主席,明年47萬黨員若koh增加91%、會變作91萬;201991萬黨員若koh增加91%、會變作300萬;2020 300萬黨員若koh增加91%、會變作573萬;到2023年中國國民黨黨員會變作25百外萬,連豬仔狗仔攏變作中國國民黨黨員才有夠,到hit陣啥物縣市長、縣市議員、立法委員、總統副總統攏免選,中國國民黨會tàng歸碗捧去。但是失禮,準講中國國民黨逐年改選黨主席,無可能有hiah濟位黨主席候選人飼hiah濟人頭黨員。所以chit-ê算法是講爽的。 Chit條路bē通,人煞bē曉用假的。像講chit遍中國國民黨主席候選人的條件之一是至少tio̍h有12,322個黨員連署。四月十六候選人登記作業截止,有六個人完成登記,吳敦義第一名連署22萬1,891份、洪秀柱12萬8,888份、郝龍斌10萬8,233份、詹啟賢10萬4,359份、潘維剛10萬0870份,干單韓國瑜5萬7,340份。六個黨主席候選人連署份數的總額是72萬1,581份,比具有黨權人數約47萬8,000人加出24萬。唯一無超過10萬份的韓國瑜,要求黨中央應該對連署的「怪現像」hō͘外界一個交代kah說明,而且話中帶刺,提醒五位競爭對手tio̍h「潔身自愛」,逐個轉來到講真話、做真事的頂面。「taⁿ你mā 好ah!」若是干單一個有「怪現像」,其他眾人當然會要求黨中央tio̍h作一個交代kah說明,今仔日是五個人對你一個,in無要求你作一個交代kah說明tio̍h已經對你真客氣,你猶teh枵飽吵啥?何況你胡言亂語練啥物siáu話,借問一下,中國國民黨tang時仔曾「講真話、做真事」過?   是按怎47萬8,000黨員有法度連署到72萬1,581份?那像黨主席參選人郝龍斌講的:「國民黨一直有縛柱仔腳、四界有賄選風聲、請客食飯的歪風氣,chiah-ê歪風氣若無改,國民黨tio̍h無希望。」無chiah-ê中國國民黨bē曉選。另外一位參選人詹啟賢講伊「絕對無人頭黨員、無縛柱仔腳、無政治利益交換。」講kah那像teh講別人有按呢做。伊講:「Chit遍黨主席改選真重要,若是國民黨koh輸2018地方選舉,tio̍h無2020總統大選,2020若koh輸,恐驚tio̍h無國民黨lo̍h!」   人講「國民黨無倒,台灣bē好。」事實上,中國國民黨雖然倒、猶佇hia,台灣猶原無夠好。Tio̍h照詹啟賢所講的「無國民黨」chit句預言真正實現。逐個目睭tio̍h剥hō͘金,看無中國國民黨的台灣生作啥款?足期待咧!
 
< Prev   Next >