首頁 arrow 綠色短評 arrow 中國國民黨khah輸一個馬戲團!

中國國民黨khah輸一個馬戲團! PDF Print E-mail
Written by 李南衡   
Friday, 19 May 2017
五月初七法國總統大選第二輪的結果,中間派、三十九歲的Macronmá-ko- lónthe̍h tio̍h 65% 的選票,成作法國歷史上上年輕的民選總統。落選的法國極右派「民族陣線」總統候選人Le Penlū pén)講伊取得「歷史性豐收」的成果,伊的得票率hō͘伊的黨成作「法國上大的在野勢力」,同時宣布beh領導伊的黨搶攻六月十一kah六月十八兩輪投票的「國民議會」選舉,伊的黨現此時佇「國民議會」577席議員中才兩席niā-niā,雖然是按呢,mā khah嬴新總統tâⁿ-á成立一年的「前進運動」黨現此時佇「國民議會」無半席,伊tio̍hchit-táu的「國民議會」議員選舉。現此時「國民議會」議員主要是拄拄落任總統HollandeO-lán-deh)所屬的社會黨有292席、上大反對黨共和黨199席。Le Penlū pén)雖然落選,但是會使講是「雖然敗選,猶原足光榮咧!」得1,199萬票,比in阿爸2012年第二輪總統大選的得票有一倍khah加。上hō͘人阿老的是伊宣布beh做一個盡職的在野黨! 咱m̄知法國盡職的在野黨生作啥款,總是咱佇電視報導頂面所看tio̍h的各民主先進國家、包括法國在內的「國民議會」,雖然mā有大細聲,但是攏猶佇「紳士」風度範圍內,西方民主國家的議會制度也m̄是三十冬五十冬的工夫、莫怪。但是若看咱國會(立法院)的運作情形實在m̄知beh按怎kā阿老。   早前咱所看tio̍h的國會(立法院),堂堂國會議員佇議會殿堂giú來捒去、甚至相拍、佔領主席台,可能是看慣勢ah,一點仔都bē感覺奇怪。不過,今年四月底開始beh聯席審查「前瞻基礎建設特別條例草案」,台灣上大的在野黨中國國民黨委員特別熱情演出,前幾工中國國民黨的黃昭順、王惠美無停teh噴啡仔(pi-á)、徐志榮、陳宜民拍鈸(boat, chhim-chhe̍h)、孔文吉摃鑼,那像叼一個廟口teh迎鬧熱,中國國民黨夯牌仔寫「拒絕綁樁(綁條仔腳),退回重審。」聯席會主席民進黨的高志鵬講,退回的訴求tī 4月24會議已經處理了,照「一事不二議」的議事規則,bē koh處理。兩黨幾遍爆發挨來捒去的衝突、the̍h議事資料khian來khian去,有中國國民黨委員beh搶高志鵬手中的mài-khù搶kah高志鵬手受傷流血。5月11 透早雙方爆發肢體衝突,中國國民黨總召廖國棟那像是beh製造「舞台效果」,the̍h麵粉來掖,歸間厝白茫茫。一遍koh一遍,咱看tio̍h一陣那像馬戲團的小丑仔佇hia假癲假siáu。問題是馬戲團的小丑仔,帶hō͘觀眾是滿滿的快樂kah笑聲。可惜中國國民黨立委的表演無hit號效果,顚倒hông看kah足siān!堂堂台灣國會上大的反對黨,tang時仔墮落到chit款?嗚呼哀哉!
 
< Prev   Next >