首頁 arrow 綠色短評 arrow 「台灣省」chit條盲腸koh teh發炎!

「台灣省」chit條盲腸koh teh發炎! PDF Print E-mail
Written by 李南衡   
Friday, 26 May 2017
五月二二,本屆世界衛生大會(WHA)開始開會,台灣因為受tio̍h中國打壓bē-tàng參加。中國寫批hō͘常駐瑞士日內瓦的各國代表團,講中國政府決定「中國台灣省」無應該參加chit遍佇日內瓦舉行的第七十屆世界衛生大會。Hō͘人驚一tiô的是「台灣省」敢是早to̍h廢掉去ah,那會猶有啥物「台灣省」咧? 1993年李登輝總統派宋楚瑜去作台灣省主席作好好,無代無誌1994年去舉辦第一遍mā是上尾遍民選省長,宋楚瑜當選。除了台北市、高雄市兩個院轄市以外,佇全台灣the̍h四百七十二萬六千外票、也就是佇八百四十萬外票中得tio̍h 56.22%,比當時由萬年國會選出來的總統李登輝koh khah有民意基礎,致使宋的chhèng kah掠bē-tiâu,想講伊是全台灣無對手的天霸王。1996年三月二三,台灣第一遍民選總統,李登輝the̍h五百八十一萬外票、得54%選票當選總統,民意基礎嬴宋楚瑜過過。1998年十二月二一李總統kā台灣省廢掉,無省to̍h無省長lo̍h!有人講事實m̄是按呢,是因為中國一再臭彈講「台灣省是中國領土不可分割的一省」,李登輝總統聽kah真噪耳,ka「省」廢掉hō͘ in chhōe無「台灣省」。若是有影是按呢,我對李前總統加尊敬三分。無,干單加尊敬兩分niā-niā,因為伊無影真正廢掉「省」,講是啥物「精省」、「虛級化」,留一個屎尾仔佇hia,雖然無功能,每年tio̍h koh編一億五六千萬營養補給chit條割無離的盲腸。   咱講「台灣省」是一條盲腸m̄是秤彩講的,除了一個省主席、一個秘書長、兩個副秘書長,無半個省府委員,下面有人事室、主計室、政風室、民政衛環組、教文及資料組、財經教法組、行政組、台灣省教師申訴評議委員會。Khah好笑的是無政可施、無公thang辦,人事費一年卻tio̍h成億萬,講伊管的土地佔全台灣的69.38%、人口佔總人口的30.68%,講伊管的有十一縣三市,事實上完全無頂司管下司的權力,也就是講十一縣三市kah台灣省政府一點仔關係都無,你講「台灣省」無廢掉kah清清氣氣,有啥路用?相信民進黨立委mā攏真清楚,2014年十月十六,排定審查台灣省政府、台灣省諮議會kah福建省政府2015年度預算,hō͘民進黨立委陳其邁總kā刣掉,干單保留福建省政府補助金門、馬祖的補助款。翻轉年一月二三,中國國民黨立委靠in人濟表決,台灣省政府預算才koh恢復。今仔日民進黨完全執政,是按怎無想beh kā「台灣省」真正割清氣咧?   中國想tio̍h to̍h kā「台灣省」chit條盲腸the̍h起來弄(lāng),弄kah發炎、弄kah台灣人真受氣。咱若真正kā「台灣省」chit條盲腸割清氣,日後中國tio̍h無「台灣省」chit條盲腸thang弄。按呢敢m̄是真好?
 
< Prev   Next >