首頁 arrow 綠色短評 arrow 政令定定改的一定m̄是一個好政府!

政令定定改的一定m̄是一個好政府! PDF Print E-mail
Written by 李南衡   
Saturday, 03 June 2017

有一位歷史學家講:「人一定tio̍h讀歷史,按呢你才知影,人無ùi歷史學tio̍h啥物。」你若看交通部長按怎做,你tio̍h會佩服chit位歷史學家。舊年五月二十新政府上台,交通部長賀陳旦的第一項「德政」,是取消五日節連假國道夜間免收費,當然引起足濟民眾的「倒彈」,伊才無情無願恢復國道夜間免收費。Chit-ê無情無願續到今年清明連假國道夜間免費,縮短作半暝一點至五點,人民對蔡英文政府的惡感加幾偌%。今年五日節,仝chit-ê交通部長賀陳旦國道五日節連假頭尾兩工半暝0點至五點免收費,中央兩工半暝三點至五點免收費。Chit種「一假兩制」擾民的收費法,會hông想講交通部長賀陳旦嫌人民對蔡英文政府的滿意度無夠低。民進黨立委鄭寶清kah陳歐珀質詢伊堅持讓步。五月二五早起忽然間精神決定順應民意,恢復連假四工攏半暝0點至五點免收費。Chit種交通部長若無緊換掉,siáng知影十月初十連續假期伊會變出啥物齣頭?

Chit種專工beh惹人民受氣的部長,那像一個嫌無夠,兩個掠來鬥?   舊年(2016)年底,為tio̍h預防禽流感,農委會宣布十二月二三起,《動物傳染病防治條例》第十四條「裝載生鮮禽卵,應使用一次性的裝載容器抑是包裝」的規定生效。雜貨店、傳統市場kah早餐店等零售抑是散裝雞卵的業者,若koh重複使用塑膠籃裝卵,後禮拜一起地方政府稽查禽場kah下游雜貨店、零售店,違法者會罰三萬至十五萬元,卵商怨講成本會增加真濟,卵可能會起兩三成,民眾罵講政府擾民。農委會畜牧處講,若照以往使用塑膠籃寸尺研發會tàng堆疊的紙箱,一遍會tàng裝二百粒雞卵,一個成本四十元,統計國內每工雞卵產量大約十一萬箱,散裝卵佔一半,有需要五六萬腳紙箱,每工至少tio̍h加開兩百至兩百四十萬的包裝材料成本。但是卵商公會已經放調無beh用紙箱,檢驗局beh按怎依法處理,出在恁lah!長期推動卵盒回收使用的「主婦聯盟消費合作社」表示,徛佇對環境友善的立場,bē-tàng接受會傷害環境的一次性包裝材料。呼籲農委會保留政策彈性,「mài一體適用」。疾管署mā m̄敢講換卵盒tio̍h會避免疾病。 今年三月初五,農委會講執行兩個月,攏無業者配合稽查,所以確定今年六月過了,beh罰繼續使用塑膠籃的業者。五月二四,農委會講決定散卵用塑膠籃裝無beh罰ah!理由是:塑膠籃是運輸載具、並m̄是包裝材枓!塑膠籃下底若有用紙套tio̍h、而且卵有洗清氣tio̍h會使。農委會真正m̄驚有人聽了暈暈去?   人民上驚政府「朝令夕改」,幾年前有一位bē見笑的官員定定改政令,hông罵、煞講「朝令有錯,夕改又何妨?」政令定定改的一定m̄是一個好政府!
 
< Prev   Next >