首頁 arrow 綠色短評 arrow 久年病歹醫!

久年病歹醫! PDF Print E-mail
Written by 李南衡   
Monday, 12 June 2017
差不多嗽十二年ah,看過台北市大細間病院診所,X光照了koh照,聽人建議去「和信治癌中心醫院」chhōe名醫,驗痰了知影好佳哉無癌細胞,食過西醫漢醫各種藥方攏無好。年初因為急性肺炎tòakoh se̍h轉來馬偕病院,真好運chithō͘沈聲燁醫師看,人講「先生緣主人福」,我真感謝伊竟然我拖十二年久的嗽治好。沈醫師足謙卑講:久年病歹醫,久年嗽oh治。 監察院審計部統計,到今年五月十一截止,各機關行政懲處記過抑是申誡處分的公務員有1,013人,其中有21人hông記大過;移送公懲會審議後kā伊降等、記過抑是申誡處分的有461人,其中有一人hông降兩級改敘、一人hông降一級改敘。照審計部統計,三年來全國攏總有1,516名公務員因為違反不得經營商業的規定,遭受tio̍h輕重無仝的懲罰,其中有42人因為情節重大遭受監察院彈劾。考試院銓敘部表示,透過今年推出的「公務員兼職查核平台」清查了後,發現猶有一百外名公務法有違法兼職的嫌疑,已經要求所屬部門進行清查。   根據《公務員服務法》第十三條規定,公務員不得經營商業抑是投機事業,mā bē使任意兼職。銓敘部兩年前訂出公務人員兼任民間企業董監事處理原則,配合全面清查公務員兼任民間企業負責人抑是董監事的狀況。銓敘部法規司長蔡敏廣表示,經過兩年外的清查,發現有1,516人違法兼職,依違法情節已經陸續有teh懲處。銓敘部為tio̍h有效杜絕公務人員違法兼職的情況,今年推捒「公務員兼職查核平台」,供各級公務機關稽查內部任用人員的人事資料,確保公務人員無違法兼職的情形。監察院審計部官員指出,公立學校教師無屬佇「公務員服務法」所講的「公務員」,佇外面企業兼職無代誌;但是若是教師同時兼任行政職務tio̍h變作公務員,監察院彈劾案文資料,有真濟hông彈劾的教授攏講in「不知情」,m̄知影擔任學校行政職務了後tio̍h辭掉佇外面企業的相關職務。   考試院銓敘部chiah呢有氣魄害我驚一tiô!會記得蔣經國就任行政院長的時有講,伊上痛恨公務員兼職,一個公務員兼兩三職的現象真嚴重,國家的錢hō͘ chiah-ê人領了去。伊任命行政院秘書長費驊兼任「公務員兼職取締委員會主任委員」。當時有人笑講,行政院秘書長chhōa頭兼任,是beh按怎取締別人咧?行政院有解說講公務員會使兼任政府「任務性」組織的主管抑是辦事人員,任務完成了後組織就解散,而且in並無領雙份薪水,是加替政府做代誌。   khah奇怪的是,蔣經國取締公務員兼職是四十五年前的代誌,敢有影親像沈醫師講的「久年病歹醫」?期待銓敘部長周弘憲會曉醫、醫會好chit-ê久年病!
 
< Prev   Next >