首頁 arrow 綠色短評 arrow 無顧環境的,攏tio̍h罵!

無顧環境的,攏tio̍h罵! PDF Print E-mail
Written by 李南衡   
Wednesday, 21 June 2017
六月初一下晡,美國總統Trump佇白宮宣布美國beh退出「巴黎氣候協定」,引起美國國內各大企業、全世界大細國的頭人攏罵。本意是簽署國beh用實際行動遏阻溫室氣體排放,以2,100年前比工業時代前升溫攝氏兩度作目標,理想是維持升佇攝氏1.5度以下。排碳第一名的中國、第三名的印度,甚至排碳量無美國千分之一的冰島攏有簽,是按怎世界排碳量第二名的美國會使退出?顧守地球每一國攏有責任,愛護地球每一個人攏有責任。雖然咱台灣是聯合國會員國,無資格去簽chit-ê協定,但是咱是地球村的一份子,當然tio̍h遵守協定。 1998年因應《京都議定書》,台灣召開全國能源會議,決定「暫時以2020年二氧化碳排放量降kah 2000年作參考值」,2012年台灣減碳設定目標煞倒退,目標2020年二氧化碳排放量降kah 2005年水準,2025年才轉到2000年水準。2012年台灣每人平均排碳量10.95噸。是全世界平均的2.5倍,全球第20名。雖然有推動「再生能源發展條例」、「溫室氣體減量法」等減碳四法。但是全球減碳推捒100%再生能源發電,目前咱台灣才干單2.9%。   咱若看六月十二雲林縣長李進勇核准六輕13張燒火碳許可證全部展延,咱tio̍h知影咱台灣實在無夠認真。公民kah環保團體罵李進勇競選縣長的時開支票講,伊若當選會禁止工廠燒火碳kah石油焦。競選支票跳票無向縣民會失禮,伊按呢敢m̄是騙選票?李進勇縣長講,伊佩服環保人士捍衛環境的理念kah努力,但是猶原tio̍h尊重法律kah法令,雲林是全國第一個通過禁燒自治條例的縣市,卻hō͘環保署宣告無效。縣民當然會使問李縣長,是按怎你tio̍h趕佇舊年520新政府上台前緊送件,那會無愛等蔡英文上台作總統了後才送件?莫怪bē准。新政府上台了後敢bē使koh申請一擺?   六月十二核准燒火碳許可證展延了後,李進勇縣長才講停發燒火碳許可證,「行政命令辦bē到」。按呢,何mih苦tī五月二四由雲林縣政府辦一場「展延燒火碳許可證公聽會」。根本是teh kā縣民、公民環保團體裝siáu-ê。   李進勇縣長講台塑已經同意,麥寮三部機組,tī 2025年進前會kā燒火碳改作燒天然氣,算是踏出第一步。到2025年,希望會tàng達到燒天然氣50%、綠能20%、但是m̄是攏無燒火碳,燒火碳佔30%。真歹勢,六月十二台塑石化總經理曹明表示,台塑會落實2025年三部機組轉換天然氣的承諾,但是電業法施行細則猶未出爐,真濟基本原則kah條件猶未定,無法度提出明確時間表。借問你相信啥人講的話?抑是兩個講的攏無teh kā信?   無顧台灣環境、無惜縣民健康的李進勇,是beh按怎koh競選縣長咧!
 
< Prev   Next >