首頁 arrow 綠色短評 arrow  Chit款的台灣人,好包起來ah!

 Chit款的台灣人,好包起來ah! PDF Print E-mail
Written by 李南衡   
Friday, 23 June 2017
六月十九,民進黨立委羅致政kah莊瑞雄,召開「外交你死我活!僑務你儂我儂?」記者會,講五月底咱台灣為tio̍h beh參加世界衛生大會,拚kah大粒汗細粒汗的時陣,卻有前僑務委員長吳英毅kah僑務委員王維,率領「全美台灣同鄉聯誼會」,去北京見中國國務院僑辦副主任譚天星,聽伊臭彈:「實現祖國完全統一,是海內外中華兒女的共同期盼。」二十幾個團員內底,有兩名僑務委員王維kah周賢孟、三名僑務顧問、三名僑務諮詢委員、三名僑務促進委員。雖然in攏是無領薪水的榮譽職,hō͘ in面子無愛面子,羅立委kah莊立委主張隨時kā in的榮譽職位挽掉。僑務委員會副委員長呂元榮講,阮事前知影了後有去kā in苦勸,但是真遺憾in執意beh去。僑務委員會一定會一個月內針對僑務人員訂定的準則處理,絕對sēng in。但是解聘tio̍h由總統核定。 Chit-ê僑團咱國內有khah生分。咱khah熟似的是「台灣同鄉會」,早前去美國留學的台灣學生kah已經學成teh工作的台灣人,雖然人佇海外,猶原思思念念故鄉台灣,而且出外人需要互相關心互相照顧,各所在tio̍h成立大大細細的同鄉會,而後為tio̍h謀求同鄉有khah大的福利kah力量,kā佇美國二十八個台灣同鄉會箍作夥,1970年七月初一,佇紐約成立全美台灣同鄉會。台灣人去全世界各國留學的學生、工作的人愈來愈濟,除了佇各國有台灣同鄉會以外,1974年九月初七,佇奧地利維也納成立「世界台灣同鄉會聯合會」,創會會員有美國、巴西、日本、加拿大kah全歐台灣同鄉會。M̄-nā勢面愈來愈大,而且因為真正疼惜台灣、關心台灣,有時難免有khah激動的言論。中國國民黨政府看了真bē爽,佇島內kā咱教育講,台灣同鄉會是共匪仝一路的人,佇海外利用抓耙仔拍小報告陷害忠良,kā khah活動的海外台灣人列作「烏名單」,害in bē-tàng轉來台灣。按呢猶無夠,叫一寡抓耙仔成立一個「全美台灣同鄉聯誼會」,穿tio̍h「台灣同鄉」chit軀外衫那像乞食假紳士。Koh提名重要成員作中國國民黨海外立委,mā有佇台灣安插好職位請in轉來。Chit遍chhōa隊的前僑委會委員長吳英毅是「全美台灣同鄉聯誼會」第十三屆會長,僑務委員周賢孟是第三十二屆會長。   2013年馬英九執政時代,「全美台灣同鄉聯誼會」年會,全美各地的代表來無兩百個,鄉情座談會參與的人干單四十外人。實在講已經真溜尾ah!   五月二九,二十外位「全美台灣同鄉聯誼會」成員轉來台北,去立法院門口聲援抗議年金改革的「八百壯士」,去中國北京見中國國務院僑辦副主任譚天星聽伊訓話,mā是總會長王維chhōa的 chit陣人。Chit款的台灣人,好包起來ah! 
 
< Prev   Next >