首頁 arrow 綠色短評 arrow 除掉「18%優惠利息存款」chit隻怪獸,人民福氣lah!

除掉「18%優惠利息存款」chit隻怪獸,人民福氣lah! PDF Print E-mail
Written by 李南衡   
Monday, 03 July 2017

The̍h一箍銀hō͘囝仔,伊可能嫌傷少無愛the̍h,但是你若hō͘全台灣每一個人一箍銀,看起來那像無tapsap,你tio̍h開兩千三百萬!政府為tio̍h四十一萬個退休的軍公教人員,享受18%優惠利息存款,一年加開145億人民的血汗錢,公員年金改革了後,會tàng省七千外億,原本預估會2031年破產的公務員退撫基金,會tàng延後到2050年才破產。Chit中間當然tio̍h koh做一遍改革。

1958年,國防部kah財政部共同發布一個無法律授權的行政命令:《陸海空軍退伍除役官兵優惠儲蓄存款辦法》,而後chit-ê優惠存款辦法陸續擴大延伸適用到公務員kah教師,當時一般銀行存款年息是12%,為tio̍h照顧收入khah低的軍公教退休人員,利息加五成hō͘ in年息18%。而後一般銀行年息落到10%的時,照本意加五成優惠存款利息應該調整作年息15%才tio̍h,但是無按呢做。而後一般銀行存款利息一直落,落到8%、6%、4%、2%,無管,in一直享受優惠18%利息存款。真正是豈有此理!   1995年李登輝總統實施退撫新制以後,新進人員無適用chit-ê優惠,但是tī 1995年以前有服務年資的人,退休後猶原會tàng辦理chit-ê 18%優惠存款。講是真大的改革,那像「18%優惠存款1995年以後tio̍h結束」,錯!事實上1995年以後入來的人,三十年後才會退休,也就是講,「2025年以後退休的人才會無18%優惠存款。」猶原是一孔烏lang-lang。   六月二七,立法院三讀通過《公務人員退休資遣撫卹法》,確立「多繳、少領、延退」的原則,新法ùi明年(2017)七月初一算起,爭議真久的「18%優惠存款利息」會tī兩年後(2021)起歸零,原本領月退者,第一年降作9%、第三年歸零;原本領一遍退休的分六年降,第一年降作12%、第三年降作10%、第五年降作8%、第七年起利息攏6%。按呢歸個年金改革攏總會tàng省七千億。真歡喜六月二九,立法院三讀公立學校教職員18% mā會tī 2021年歸零。   軍公教退休人員18%優惠存款的錢ùi叼位來?台灣銀行不過是辦理的銀行而已,利息差額tio̍h由政府補貼,政府的錢ùi叼位來?當然是人民納稅的血汗錢,七成的人民贊成年金改革,「18%優惠存款利息」tio̍h廢除。Che m̄-nā是蔡英文 向人民兌現伊競選總統的時所開的支票,向人民交出一張上súi的成績單,koh khah了不起的是,解決李前總統解決無了的、阿扁總統因為立法院中國國民黨委員佔大多數干單會tàng解決一絲仔、馬英九總統thiau工放hō͘爛的財政烏洞。   除掉「18%優惠存款利息」chit隻怪獸,人民福氣lah!
 
< Prev   Next >