首頁 arrow 綠色短評 arrow 台北市民用選票對中國大聲講:「NO!」

台北市民用選票對中國大聲講:「NO!」 PDF Print E-mail
Written by 李南衡   
Monday, 17 July 2017
舊年台北市長柯文哲為tio̍h八月beh去上海參加「雙城論壇」,三月底接受中國新華社、中央電視台kah中評社等三間媒體聯合採訪的時,講啥物伊堅持用「兩岸一家親」的精神來促進交流。其實台灣人「兩岸一家親」chit話,chit句話2013年中國國家主席習近平講的,柯市長khioh tio̍h習主席的話鬚,講kah足得意。莫怪中國大細粒官員相續謳咾柯市長對兩個城市交流誠有利,中國國台辦主任張志軍謳咾柯市長講「兩岸一家親」是真重要的理念。一年來chit句話hō͘台灣人罵kah臭頭,柯市長那像甘願的款式,解釋講:「一家親總比一家仇khah好」,問題是咱kah in是一家。柯市長敢真正知影「台灣是台灣、中國是中國,田無溝水無流,一人一家代、公媽隨人chhāi」? 今年柯文哲市長koh khah m̄是款,伊講台北市kah上海市是「命運共同體」,真正是莫名其妙!咱台北市前前後後kah全世界四十七個城市結作「姐妹市」,其中有二十六個城市是in hit國的首都,咱tang時仔bat講台北市kah某某姐妹市是「命運共同體」?m̄-bat,一遍都m̄-bat。上海市既m̄是台北市的姐妹市、mā m̄是kah台北市仝款平平是首都,到底是按怎台北市會kah上海市是命運共同體?敢講中國若拍飛彈攻打台北市,上海市tio̍h會有一大堆人tio̍h傷?實在m̄知柯市長叼一條神經腺phoah m̄ tio̍h位去,才會講出chit種戇話!   柯文哲市長舊年講的「兩岸一家親」,今年進一步變作「命運共同體」,「一個中國」箍佇柯市長的頭殼頂脫bē開,那像箍佇孫悟空頭殼頂的「金箍」。莫怪記者會問伊,講兩岸一家親、命運共同體,是m̄是為tio̍h預設「一個中國」的劇本?歸嘴攏是「政治」的柯市長煞講:論壇定義作兩岸城市交流,盡量mài牽涉傷濟政治的意涵。   上蓋hō͘咱台北市民聽bē落去的是,柯文哲市長佇會後用翁某冤家相拍來比喻兩旁的關係,伊講「有時翁某冤家啥款歹聽話都罵會出來,但是床頭拍、床尾和。」真嚴重!啥物比喻bē tang比,kā台北,上海兩個城市比作翁某,(若是kā兩岸比作翁某,相信台灣其他縣市的人攏會跳起來!)柯市長才去上海幾工,竟然已經kah上海市好kah爬起去眠床頂,che若m̄是「野合」,啥物才叫作「野合」?台北市民那會恬恬無出聲?無叫蔡閨開的徵信社去掠hit隻m̄成猴敢會使得!   人講柯文哲市長的嘴生佇伊的身軀,伊beh講啥物話你敢有法伊?無,完全無法伊。唯一的辦法就是明年市長選舉,台北市民用選票kā柯文哲踢leh邊仔,按呢tio̍h是對中國大聲講:「No!」
 
< Prev   Next >