首頁 arrow 綠色短評 arrow 台北市政府實在真失氣!

台北市政府實在真失氣! PDF Print E-mail
Written by 李南衡   
Friday, 25 August 2017
台北市政府主辦第二九屆夏季世界大學運動會,咱簡單叫作:「2017年台北世大運」。Ùi八月十九起至八月三十佇台北市舉行的chit-ê世大運,會使講是台灣有史以來主辦層級上蓋懸的一個國際性體育比賽。M̄-nā是台北市民,應該是全台灣兩千三百萬同胞攏足興奮、攏足期待chit-ê世大運辦hō͘好,逐個攏足歡喜會tàngtio̍h chit-ê機會hō͘全世界的人看tio̍h咱台灣。 Chit遍台北世大運開幕進前,真濟企業看tio̍h chit-ê熱潮,mā相續推出聯名商品,期待透過chit場國際賽事,展現Made in Taiwan(MIT)的製造kah設計實力。Tī開幕前九工世大運執委會召開一場官方紀念商品記者會現場,mā特別邀請mo͘-lé-luh穿tio̍h會tàng展示MIT科技機能kah運動潮流風的服裝kah裝飾的系列產品行舞台sho w。   Chit遍台北世大運官方的紀念商品攏總分作九大類、165項,有筆記簿、圍巾、服裝、裝飾品、帽仔、雙層玻璃保溫杯,真濟商品攏用「熊讚」兩字(取上讚的音),像講熊讚布尪仔、熊讚的柴品仔、熊讚花果芳味蠟燭、掛耳式咖啡、徽章、運動帽、紀念章等等;攏總有六十六間中小kah新創微型企業、六間社會企業,網羅超過一百位設計kah製造專業人士參與。會tàng看出逐個同心協力beh kā chit遍台北世大運辦hō͘成功的熱情。Ùi舊年七月到今年六月,已經有賣出真濟世大運的周邊產品。   Khah奇怪的是,台北市政府的世大運官方授權商品專賣店內底,有bē少的商品是「中國製」(Made in China)的,咱實在m̄知影「中國製」的商品beh按怎展出MIT(台灣製)的軟實力!佇台北市政府的世大運官方授權商品中「中國製」的佔有三成,包括世大運歕風的加油棒、熊讚杯仔chū、熊讚圓形的徽章、熊讚刺繡的布貼、熊讚活動式的鎖匙圈仔、大運來ah刺繡萬用吊牌、環遊世界熊讚購物袋、熊讚花果芳味蠟燭等等。Hō͘人看tio̍h真hàiⁿ頭!有人發出質疑,周邊商品的主辦人員解說講,因為經費的關係,買中國製的商品khah省錢。照台北市政府所講的,chit遍世大運tio̍h開兩百億,是m̄是講世大運mài辦上省錢?   一九八0年代,全世界的人攏講「日本第一」,日本產品佇全世界chhèng kah掠bē-tiâu。美國零售商協會印大大張的海報四界貼,頂面寫講:「拒絕用日本製商品!」有目睭khah利的人發現,佇海報下底有印一排細細的英文字:「日本印的」。Hit遍美國零售商協會大失氣。   世大運官方授權周邊商品,「中國製」的佔三成。Chit遍台北市政府真失氣!
 
< Prev   Next >