首頁 arrow 綠色短評 arrow 中國國民黨,拜託mài改名!

中國國民黨,拜託mài改名! PDF Print E-mail
Written by 李南衡   
Monday, 28 August 2017
八月二十吳敦義就任中國國民黨新主席的前兩工-八月十八,接受日本「產經新聞」專訪的時,針對台灣意識愈來愈懸的今仔日,是是應該改名作「台灣國民黨」的問題,吳敦義表示反對,伊足有自信指出「國民黨有光榮的歷史,無必要改名。」 佇美國若有一個政黨叫作「英國保守黨」, m̄-nā無可能hō͘美國人接受,甚至會hō͘美國人笑siáu-ê,問講啥人頭殼歹去?佇日本有一個政黨叫作「民進黨」,伊當然mā會使叫作「日本民進黨」,但是若叫作「台灣民進黨」,日本人無人會接受、甚至會笑死。世界上有幾若個國家有政黨的名叫作「國民黨」,但是in攏無佇黨名頭前標明國名。真奇怪的是,明明是佇台灣的一個政黨,黨名卻叫作「中國國民黨」,che會使講是「土豆準蓮子」(Chit句台灣俗語話m̄是teh比並叼一個khah價值,干單teh比如一個人亂亂來niā-niā),中國的國民黨來殖民統治台灣七十年久,真濟台灣人竟然麻痺,kā家己準作飼料雞,有thang食tio̍h足歡喜,koh有一寡人「雞仔子tòe鴨母」去倚in,為tio̍h小小的利益,台灣人去加入中國的國民黨。佇台灣的「中國國民黨」既然佇頭前特別標明「中國」兩字,tio̍h是強調in是屬佇「中國」的「國民黨」。按呢,黨的全名tio̍h bē使隨便簡稱叫作「國民黨」。那像「民主進步黨」簡稱叫作「民進黨」,「中國國民黨」若beh簡稱應該叫作「中國黨」。但是真失禮,今仔日佇台灣認同家己是「中國人」的無5%,所以有真濟「中國國民黨」的黨員主張改名作「台灣國民黨」,才khah有延續落去的可能。但是吳敦義主席強調「國民黨有光榮的歷史,無必要改名。」包括吳敦義主席向日本媒體講話中間,mā無講是「中國國民黨」,大大細細「中國國民黨」的黨官,出嘴mā攏是講「國民黨」按怎按怎。按呢,黨名是m̄是at-sá-lih改作「國民黨」khah歸氣?因為mài有「中國」顧人怨hit兩字,可能會tàng活kha久。但是相信吳敦義主席死鴨仔硬嘴pe會koh講「國民黨有光榮的歷史,無必要改名。」一定beh繼續叫作「中國國民黨」。   今仔日講tio̍h「中國」,台灣人歸個攏刺鑿起來,猶koh堅持黨名叫作「中國國民黨」,咱tio̍h知影chit-ê黨已經是「田螺行到竹篙尾-無步ah!」咱期待吳敦義黨主席kah大大細細黨官kah幾十萬黨員,會記得隨時講家己的黨名叫作「中國國民黨」,所有電視談話性節目的名嘴,攏tio̍h叫in「中國國民黨」,hō͘全世界的人知影chit-ê黨名偌呢hàm。Kā叫kah「中國國民黨」倒去無去為止。   「中國國民黨」,拜託mài改名!
 
< Prev   Next >