首頁 arrow 綠色短評 arrow 九二無共識,一中無人表!

九二無共識,一中無人表! PDF Print E-mail
Written by 李南衡   
Friday, 01 September 2017
世間真濟發明對人類文明有貢獻,有的發明是害死人的。佇台灣有一位政治口號發明家蘇起,原本是佇中國國民黨李登輝政權擔任陸委會主委,2000年政黨輪替,五月二十民進黨陳水扁就任總統前的四月二八,宣布伊害台灣的政治口號新發明:「九二共識,一中各表」,講是1992年,台灣海峽兩岸政府授權的非官方組織台灣的「海峽交流基金會」(簡稱「海基會」),kah中國的「海峽兩岸關係協會」(簡稱「海協會」),佇香港會談了後,無任何書面協議、約定、無任何法律效力,干單口頭上含糊講中國干單一個niā-niā,蘇起講台灣講「一個中國」但是有「各表」:inhit-ê中國是中華人民共和國,阮講hit-ê中國是中華民國。Hit-ê完全無共識、各人想各人講的話,天才發明家蘇起講按呢叫作:「九二共識,一中各表」。其實中國hit旁所想所講的是「九二共識,一個中國」,伊講台灣的中國國民黨政府所想所講的是「九二共識,一個中國兩旁各人表述」。 2008年台灣koh一遍政黨輪替,中國國民黨的馬英九政權上台了後,一直kā「九二共識,一中各表」準作「寶」,其實是中國共產黨為tio̍h beh表示伊khah親中國國民黨、無合意民進黨,所以thiau工tèⁿ m̄知,出在馬英九政府佇台灣大細聲喝「九二共識,一中各表」是兩岸和平安定的基礎,其實中國khioh起來講的「九二共識」就是「一中」,自了m̄-bat承認有啥物「各表」。八月底,中國國民黨新主席吳敦義接受媒體訪問的時講,馬英九kah習近平佇新加坡會面握手的時,bē使講「一中各表」,驚習主席受氣、無愛kah你談,但是會後家己開記者會的時,習主席無在場,馬英九tio̍h會使講「一中各表」。   中國最近幾年攏會公布:「新華社新聞信息報導中的禁止用詞kah慎重用詞」,當然每年攏會增加。今年七月公佈增加的有一項:「Bē使使用台灣方面『九二共識、一中各表』的講法。」也就是講媒體干單會使提起「九二共識」niā-niā,kah「一中各表」完全無關係。你看中國國民黨新主席吳敦義就任演講,強調會用「九二共識」作基礎,堅決反台獨、促進兩岸互相尊重kah包容。M̄敢提起「一中各表」,吳敦義主席驚kah按呢,佇習大人的心目中是m̄是算作有乖有聽話?   一九九二年當時的李登輝總統、代表台灣去香港kah中國會談的辜振甫先生攏講hit當時無啥物「共識」。準若有,唯一的「共識」tio̍h是兩旁講bē對同。 那像某一個查埔講無beh娶某一個查某,hit-ê查某講伊無beh嫁hit-ê查埔,兩人攏講無beh kah對方結婚,講tio̍h是in兩人有「共識」。敢bē感覺真好笑!   九二無共識,一中一個bē giàn表,一個m̄敢表。「共識」tio̍h是逐個煞煞去!
 
< Prev   Next >