首頁 arrow 綠色短評 arrow 背叛敢是中國國民黨老黨員的傳統?

背叛敢是中國國民黨老黨員的傳統? PDF Print E-mail
Written by 李南衡   
Wednesday, 13 September 2017
九三軍人節的前一工,前陸軍上將許歷農轉來台灣發表公開批,講伊無koh再反共,講chitbeh「促統」(促進兩岸統一)。伊的批講,以前伊會反共,是反對當時中國實施的共產主義,kah佇共產制度下的一寡不當的作為kah措施,像講清算鬥爭、限制個人生產、大躍進、實施人民公社、批孔揚秦、文化大革命。伊講,中國自從鄧小平推動「改革開放」以來,無koh遵循任何主義,無koh再照抄外國模式,實是求是以提升人民生活水平。伊認為中國「改革開放」三十外年來,已經無koh是散赤、落後的共產國家,是世界經濟大國之一。當今中國的思想kah作為,完全符合正常國家發展的原則,對兩岸攏有利。當年反共的理由,早tio̍hkoh存在,當然使為反對來反對。所以伊無koh再反共。 許歷農講中國「無koh遵循任何主義」,伊m̄驚去北京習近平kā 伊khia̍k頭殼罵伊老糊塗?八月初一,解放軍建軍九十周年習近平才kā解放軍講:「堅持黨對軍隊的領導,確定軍隊永遠tòe黨行」,人民解放軍永遠是黨的軍隊,人民的軍隊。Hit-ê黨是中國共產黨,遵守共產主義。M̄-nā按呢,政府官員犯罪,是中國共產黨先kā伊「雙規」,調查了決定按怎處分,才交hō人民法庭去開庭審判。   許歷農講:「當今中國的思想kah作為,完全符合正常國家發展的原則。」你有影m̄驚笑破人的腹肚?咱台灣人李明哲去中國,m̄知犯tio̍h啥物罪,mā m̄知hō͘啥物單位掠去?關佇叼位?關一百七十外工才由一個自稱是李明哲的律師拍電話來hō͘李太太李凈瑜女士,講最近會佇湖南省岳陽市中級人民法院開審,其他攏無講半項。借問許歷農,叼一個正常國家會按呢做? 1949年四月初一,中華民國政府派張治中將軍chhōa一行六名的「和談代表團」去北京和談,六名攏是中國國民黨政府親信的重要幹部,去到北京歸個依過去。四月十三拍電報hō͘李宗仁代總統kah何應欽講是周恩來交來的「國內和平協定」,koh拍電報hō͘蔣介石勸伊「放下一切」。有夠bē見笑。Chit幾年中國國民黨的前主席、重要黨官、將軍,一團一團去中國hō͘中國共產黨主席搔頭殼、聽訓話、參觀中國人民解放軍閱兵。你想講那會hiah bē見笑?有樣看樣ah!   看tio̍h許歷農,hō͘人想起張治中。In兩個攏是中國國民黨員,攏是中華民國陸軍二級上將,攏是安徽人。張治中比許歷農khah súi氣的是,張治中tī hit年的六月宣布脫離中國國民黨。咱無看tio̍h許歷農宣布脫離中國國民黨、留佇中國共產黨統治下的中國。兩個猶有一點仝款的是:背叛伊的黨、背叛伊的國。   有人懷疑,背叛敢是中國國民黨老黨員的傳統?
 
< Prev   Next >