首頁 arrow 綠色短評 arrow 李凈瑜,你hō͘阮感覺真光榮!

李凈瑜,你hō͘阮感覺真光榮! PDF Print E-mail
Written by 李南衡   
Friday, 15 September 2017

台灣NGO人權工作者李明哲,三月十九ùi澳門入境中國廣東省珠海市隨時hō͘人舞失踨完全失聯。十工後,中國國務院對台辦才佇記者會中證實,李明哲因為「涉嫌從事國家安全活動」hō͘相關部門調查。69工後的五月二六,中國國務院對台辦才證實,李明哲因為涉嫌「煽動顚覆國家政權罪」,經過中國檢查機關批准了後,是湖南省安全機關所掠。李明哲的家後李凈瑜kah「非政府組織」(NGO)多次召開記者會,希望會tàng去中國chhōe翁婿,台胞證煞hông註銷無法度去,李凈瑜佇NGO陪同之下,去美國討救援。七十外工後的九月初六,李凈瑜kah伊的大家才接tio̍h中國律師電話,通知李明哲beh開庭叫in緊去。九月初十,in兩人佇律師、海基會人員、民間團體人員陪同之下,坐飛機去中國湖南省。

九月十一,九點半佇中國湖南省岳陽市中級人民法院開庭,准in兩人旁聽。李明哲佇庭上對檢方的指控表示無異議,而且幾若遍佇庭上the̍h稿照讀強調伊「惡意抺烏中國共產黨、中國現行的制度、中國政府」,意圖顚覆國家政權。相信李明哲的老母kah家後等到in聽tio̍h李明哲講「感謝執法單位的文明辦案」,才歸個放心起來。李明哲會講「文明辦案」,to̍h知影李明哲講的全部攏是假的。   中國起訴李明哲的犯罪行為,攏是李明哲佇台灣「上網」所講的,佇台灣攏是言論自由的,攏是合法的。準若有違反中國法律的所在,照中國《刑法》第八條規定,「外國人佇外國對中國犯罪,而犯罪地法律無處罰者,中國無管轄權。」李明哲當然無罪。中國叫彭宇華請李明哲緊去中國,一下到中國境內to̍h kā掠去,講che叫作「法治國家的基本常識」,實在是目睭金金人傷重teh亂亂講!   開庭了後,佇庭外李明哲有kah老母、家後會面,特別交待:「轉去了後mài koh講ah」。轉來台灣了後,李凈瑜偏偏發表聲明講,我何必開一大把錢倩律師來配合導演搬戲咧!伊強調,「失去自由的人有權利講m̄是伊真正beh講的話」,李凈瑜講伊是一個自由人,一定tio̍h繼續捍衛李明哲的尊嚴。伊講,面對暴行恬chih-chih是罪惡。Hō͘咱想起德國尼摩拉牧師佇二次世界大戰後的懺悔文,講伊當年面對「納粹」的軟弱,講當納粹來掠共產黨的時,我佸chih-chih,因為我m̄是共產黨;In關押社會民主黨的時,我佸chih-chih,因為我m̄是社民黨;In來掠工會會員的時,我無抗議,因為我m̄是工會會員;In來掠猶太人的時,我佸chih-chih,因為我m̄是猶太人。有一工in來掠我的時,無人替我講話。   九月十一記者會,李凈瑜兩枝手骨夯懸,一枝手寫「李明哲」,一枝手寫「我以你為榮」(你hō͘我感覺真光榮)。阮beh大聲講:李凈瑜,你hō͘阮感覺真光榮!
 
< Prev   Next >