首頁 arrow 綠色短評 arrow 攏是人m̄-tio̍h!

攏是人m̄-tio̍h! PDF Print E-mail
Written by 李南衡   
Friday, 22 September 2017
七月初,台北市長柯文哲去上海參加「台北上海雙城論壇」轉來,發現那會hiah濟人受氣、對伊佇上海的發言不滿。伊講2015年拄仔作台北市長、第一遍參加雙城論壇的時,伊tio̍h講「兩岸一家親」,當時反應無hiah大,是按怎今年逐家對伊有意見?柯市長敢知影逐個對伊的不滿,是伊「兩岸一家親」變本加利,koh加講「建構兩岸生命共同體」、兩岸那像翁某「床頭拍床尾和」。 「兩岸一家親」是2013年十月,中國國家主席習近平喝出來的,真濟人m̄知,但是柯文哲市長一定知。當伊kah中國官員見面的時,那像鸚哥鳥學話tòe中國頭人講「兩岸一家親」,中國大細粒官員當然會kā柯市長當作家己的人。頂日民進黨立委鄭寶清講柯市長m̄是深綠的、是淺紅的。柯市長講無人有才調kā伊抺烏,只好kā伊抺紅。錯了!柯市長,是你家己擦紅的。   柯文哲市長看tio̍h hiah濟人罵伊佇「台北上海雙城論壇」演講的失言,九月十三接受電視專訪的時,伊怨歎國安會、陸委會放伊孤單一個處理雙城論壇kah世大運。柯市長講,伊去雙城論壇,演講稿事先有送hō͘國安會,但是國安會高層卻「已經讀了m̄回」;世大運期間,柯市長kah中國國台辦交流局長黃文濤見面,陸委會官員bih起來無beh處理,放伊家己一個去kah阿共「釘孤枝」,出代誌了後koh用che來攻擊伊。柯市長講kah嚨喉tīⁿ起來、話講bē出來。   第二工,總統府發言人林鶴明表示,針對公務人員去大陸地區,政府原本就有相關的規範,相關出訪行程依法向內政部審查會申請tio̍h會使,並m̄是向國安會申請。間接講柯市長的演講稿根本無可能送到國安會。隨時引起真濟政治評論家的指責,甚至有人質問柯市長演講稿到底送hō國安會啥物人?公文字號幾號?講陸委會無人插伊,伊啥物時間kah陸委會啥物人連絡的?陸委會按怎回答?請柯市長一個一個講清楚。若是柯市長講白賊tio̍h退出政壇。柯市長講是伊辦公室主任蔡碧如送去國安會,送兩遍。九月二十,佇議會進行施政報告的時,柯市長koh一遍強調伊雙城論壇的演講稿內容國安會事先有看過,是國安會派人來市長室the̍h的。koh講伊無講白賊。總統府擋bē tiâu,仝一工khah òaⁿ,總統府發言人表示:國安會chêng到今無the̍h-tio̍h柯市長去上海雙城論壇的演講稿。   那像台北市政府到舊年底有走十七個一級主管、3429個員工。那會按呢?柯市長應講正常人事異動有啥奇怪?今年九月初有人問柯市長那會hiah濟主管相續離職?伊無檢討家己,應講因為「無thang thio(意思是無thang歪哥)」。   攏是人m̄-tio̍h!Che就是台北市長柯文哲的心態。
 
< Prev   Next >