首頁 arrow 綠色短評 arrow 中國tang時會拍台灣?

中國tang時會拍台灣? PDF Print E-mail
Written by 李南衡   
Friday, 13 October 2017
早前傳講,台灣若宣布獨立、抑是明確行向獨立、抑是台灣內部動亂不安、抑是台灣得tio̍h核子武器、抑是海峽兩岸和平對話延延(iân-chhiân)拖久、抑是外國勢力介入台灣島內事務、抑是外國兵力進駐台灣等,中國解放軍tio̍h會武力解決台灣(意思是講出兵拍台灣)。中國一直無停要求解放軍tio̍h tī 2020年以前完成對台動武全面性作戰能力的整備,作戰計畫做hō͘好勢。1994年有一本冊《1995年閏八月》,講中國會1995年閏八月拍台灣,寫kah有腳有手、那像真的。1995年閏八月過了,根本無啥代誌發生,才知影hông騙去,落尾發現作者鄭浪平是一位美國籍的華人、當時是新黨洛杉磯聯絡人。哦,原來是按呢。 最近有人teh hán講2020中國會拍台灣,講是ùi中國hit pêng傳出來的。但是一寡學者分析,中國古早的孫子兵法有講:「攻其無備,出其不意。」意思是講相戰會贏的秘訣是,趁敵人無準備、敵人無想tioh的時陣去kā拍。中國那有可能hiah戇,to̍h m̄是看電影,先放預告片hō͘你看。   十月十一,民進黨立委莊瑞雄kah中國國民黨立委江啟臣,攏佇立法院問備詢的國防部長馮世寛,北朝鮮最近直直試射飛彈、核武試爆,引起東北亞的神經線peⁿ真ân真緊張,有消息講美國若kah北朝鮮戰起來,中國tio̍h會拍台灣。問部長聽tio̍h chit-ê消息,有啥感觸?馮部長講「我感觸是中國無hiah戇。但是咱koh khah應該加強戒備。」其實hit段話是舊年二年十七,香港「鳯凰衛視」訪問中國上海國際問題研究院亞太研究中心助理研究員于迎麗博士的時,于博士講:「假使美國用軍事手段解決朝鮮核武問題,按呢咱佇台灣問題頂面無排除會用武力手段。」早前傳講台灣若按怎,中國tio̍h會出兵拍台灣,無管伊的理由偌呢無道理,總是猶有一個「因為」按怎,「所以」beh出兵拍台灣。美國若拍北朝鮮,中國tio̍h beh拍台灣,che連用「因為」按怎「所以」按怎mā講bē落去。那像中國若講,台灣人若食宵夜tio̍h beh出兵kā拍,仝款是胡言亂語。   中國若beh出兵拍台灣tio̍h照實講「beh侵略台灣」,mài講:「Beh用武力解放台灣!」按呢講會hō͘全世界的人笑。「解放」台灣白話講作“tháu-pàng”,意思是beh去kā人的束縳解除、hō͘人得tio̍h自由kah發展,特別是指推翻獨裁專制的統治者。咱台灣人民主自由的生活過了真慣勢,m̄-nā人權有受tio̍h尊重kah保障,甚至猶有氣力kā愛心化作行動去關懷幫贊全世界各所在的人。「中國人民解放軍」若真正hiah熱心,請留佇中國國內解放in hiah-ê需要解放的同胞。   中國tang時會拍台灣?民主自由的台灣人幸福快樂,無需要人來解放!
 
< Prev   Next >