首頁 arrow 綠色短評 arrow 中國國民黨kā告!

中國國民黨kā告! PDF Print E-mail
Written by 李南衡   
Monday, 23 October 2017
九月中旬,中國國民黨收tio̍h一份ùi外交部代轉某一位外國貴賓的致謝批,批囊頂面收件人,原本是用印仔tǹg「中國國民黨」字樣,而後才用「修正帶」「中國」兩字塗銷掉,koh佇「國民黨」後面寫「中央黨部」,引起中國國民黨的不滿,質疑外交部有「去中國化」的意涵。外交部表示,歸個事件純然是單一個案作業的疏忽,造成誤解實在真失禮。中國國民黨文傳會主委李明賢講chit款的疏忽hông感覺真遺憾。伊質疑蔡英文政府當teh執行「去中國化」,批囊頂面的黨名「中國」兩字塗銷掉,真容易會hō͘人政治聯想,伊呼籲外交部長李大維徹查,伊koh唱蔡政府若是beh「去中國化」,應該先ùi「中華郵政」、「中國石油」等國營企業改名,是對「中國國民黨」chit種民間社團開刀。 九月二二,中國國民黨籍的台北市議員鍾小平為tio̍h chit項代誌去台北地檢署按鈴控告外交部長李大維涉嫌偽造文書、毀損文書罪,而且要求李大維出面道歉。伊質問,按呢敢是beh剪斷兩岸五千年的血脈kah文化?敢是beh用按呢來傷害中華民族?   咱已經講過幾十遍,佇台灣有「中國國民黨」chit項代誌本身tio̍h是一個笑話,佇台灣竟然有「中國」的政黨,咱tio̍h一直kā叫chit-ê譀(hàm)-kōa-kōa的黨名,叫kah chit-ê黨佇地球上消失去。所以咱當然tio̍h指責外交部無應該有chit種疏忽。外交部應該知影,澳洲、南非、斯里蘭卡,真濟國攏有「國民黨」,若無寫「中國」,啥人知影伊到底是叼一國的「國民黨」?   咱贊成中國國民黨kā告,第一應該告的是in黨主席吳敦義、文傳會主委李明賢kah in黨的台北市議員鍾小平,逐個斟酬看注意聽,無論佇新聞報導抑是佇政治性談話節目中,in開嘴tio̍h是講「國民黨」按怎按怎,若講公開「去中國化」無人會嬴in。第二應該kā告的是所有電視台新聞主播、各電視台政治性談話節目的主持人kah來賓,十個有九個、十句話有九句講「國民黨」按怎按怎,真少人會講「中國國民黨」,「去中國化」mā相黨嚴重。   猶koh一個m̄好漏去,十月十一,中國媒體《觀察網》的專欄作家尹國明講,國民黨早早tio̍h m̄是中國和平統一會thang期待的力量,強調阻礙中國統一台灣的第一政治勢力正是國民黨,第二才是民進黨。Chit-ê尹國明真可惡,唱兩遍「中國國民黨」攏特別「去中國化」,無提「中國」兩字。中國國民黨kā告!   見若有人講「國民黨」頭前無加「中國」兩字,為tio̍h beh堅持中國國民黨是「中國的」,中國國民黨kā告!
 
< Prev   Next >