首頁 arrow 綠色短評 arrow 台灣故宮博物院想beh送肉飼虎!

台灣故宮博物院想beh送肉飼虎! PDF Print E-mail
Wednesday, 04 March 2009

        二月二五,佳士德拍賣行將法國服裝設計大師聖羅蘭在生e5收藏品,一隻青銅貓鼠頭及一隻青銅兔仔頭,分別以一千四百萬歐元成交。引起中國文物局真受氣,講chit兩件古物是ui3中國圓明園偷theh8 e5ti7拍賣進前tioh8一再呼籲m7 thang拍賣,竟然無聽勸解,「一意孤行」堅持拍賣,「損害了中國人民e5文化權益及民族感情。」放調一切後果由佳士德拍賣行負責!

        第二次英法聯軍拍清國,ti7一八六0年十月十三攻入北京城,清國皇帝走路去熱河,英法聯軍搶劫圓明園及靜宜園,koh放火燒圓明圓燒兩工,三百外名太監及宮女葬身火海。聽講chit遍拍賣e5 chit兩隻青銅獸頭,就是當年佇圓明園搶走運去法國e5一大堆古物其中e5件。

  照中國人e5意思,chit兩隻青銅獸頭是中國e5財產,tioh8應該還中國。按呢講若會通,借問一下,中國e5土地應該有偌大?三千年前只有中國現此時西北一屑屑仔叫作「九州」e5土地,抑是兩千年前及一千年前所謂「漢唐盛世」hit時陣e5土地?抑是hou7蒙古人佔了了佔kah無半屑e5土地?抑是hou7滿州人佔了了佔kahchhun一塊仔e5土地?以今仔日中華人民共和國e5土地來講,有偌濟是三千兩前有e5?有偌濟是四百年前、一百年前有e5?早前kang5搶來侵佔e5土地敢免還人?若是免還,人是按怎tioh8還你古物咧?

  台灣故宮博物院院長周功鑫二月十四去中國訪問,講beh及北京故宮、上海博物館交流,預定今年十月beh佇台北舉辦「雍正大展」,中國古物beh用「借展」e5方式。日後台灣故宮e5古物當然ma7 tioh8借中國展。中國真有可能照in華語所講e5「有借有還,再借不難。」頭起先ka7咱借十件八件攏有還,一遍比一遍借khah濟,幾遍了後借幾十、幾百件,煞有去無回!若是有人罵我是「以小人之心度君子之腹!」我beh問:中國敢是君子?咱以二月十四台灣故宮博物院長周功鑫chhoa7團去訪問北京故宮作例來講,原本中國講beh開放媒體採訪,臨時緊喝「切」,取消所有記者採訪行程,害周功鑫院長煞戇去,m7beh按怎才好。中國若扣留咱借in 展覽e5故宮文物m7還,理由真簡單:He是早前蔣介石集團偷theh8去台灣e5「賊仔物」,當然應該還hou7主人。台灣若是不服,中國會使招你舉辦一遍公投,由十三億外e5中國人及兩千三百萬e5台灣人做夥來公投,共同來決定贜物應該歸to2一旁?台灣獨立,中國敢m7ma7tioh8由十三億中國人及二千三百萬台灣人共同來決定?

台灣故宮博物院beh借古物hou7中國theh8去展覽,明明是beh送肉飼虎!
 
< Prev   Next >