首頁 arrow 綠色短評 arrow Chit款的中國你敢bē驚?

Chit款的中國你敢bē驚? PDF Print E-mail
Written by 李南衡   
Friday, 27 October 2017
中國共產黨第十九次全國代表大會(簡稱「中共十九大」)十月十八至二四佇北京召開。照「中國共產黨章程」規定,全國代表大會每五年舉行一遍,由中央委員會召集。習近平佇本次大會開幕式上代表第十八屆中央委員會作三點半鐘的報告。十月二四早起舉行閉幕式,當日選舉產生了第十九屆中央委員會kah第十九屆中央紀律檢查委員會習近平新時代中國特色社會主義思想寫入黨章中共第十九屆中央委員會第一次全體會議第二工早起召開,選舉產生了中央委員會總書記tio̍h是習近平作最高領導者)、中央政治局中央政治局常務委員會中央書記中央軍事委員會等此後五年中共權力的核心機構。 Chit段期間,咱台灣的各種新聞媒體誠拚勢報導。中共頂頭的人事按怎換咱khah無趣味、事實上mā看m̄-bat。所以咱tio̍h會去注意一寡有的無的小消息。像講開會期間,北京城禁止熱氣球滿天飛、抑是禁止無人飛機飛行,應該無人有意見。但是有的禁令tio̍h超出一般文明社會的人所會tàng理解的,像講開會期間,會場附近攏禁止起火,致使真濟餐廳攏tio̍h暫時停止營業,北京城內有幾千人的大工廠攏tio̍h歇睏抑是sóa去外縣市工作,所有商店攏bē使賣任何刀仔抑是囝仔sńg的假銃;網路商店kah運送公司,攏拒絕銷售、運送液體、粉體、糊仔體的物件;歸個十月,北京市中心的「民宿網站」攏暫時停止營業。新疆的人會講按呢那有啥?佇新疆早tioh要求人民,所有的刀仔、斧頭、摃錘、鋸仔見若有可能會傷害tio̍h人的金屬類器具,攏tio̍h刻名字抑是刻會tàng辨認的身分號碼。   佇講是「一國兩制」的香港mā真緊張,會議前tio̍h kā 2014「兩傘運動」的領袖黃之鋒kah羅冠聰掠去關,一直等到十月二四「中共十九大」開會煞,法院才裁定各以五萬港幣交保kā in兩人放出來。   Tī「中共十九大」開會前一年tio̍h開始對網路、社群軟體、新聞、戲劇等領域進行嚴格控管,希望透過言論控制來穩固當局。中國早早tī 1998年tio̍h開始建立強大的「防火長城」,阻擋任何人使用無受北京當局控管的外來網頁kah社群軟體,像講「面冊」(Facebook)、Twitter等國際各大新聞網站。你敢知,中國負責控管網路的科技人員超過一百萬人。   看中國一寡奇事怪談,咱台灣人有時會看看笑笑咧,有時會搖頭感慨幾聲,mā有人想講:「管伊北京落雪」kah咱無tī-tāi。但是中國國家主席習近平佇「中共十九大」開幕式無代無誌講:「台灣同胞kah中國同胞會tàng享受仝等的待遇。」真夭壽,害足濟台灣人走去收驚!
 
< Prev   Next >