首頁 arrow 綠色短評 arrow 明明是頭毛試火!

明明是頭毛試火! PDF Print E-mail
Written by 李南衡   
Friday, 10 November 2017

台中市清水區戶政事務所秘書陳秀珍講,頂箇月(十月)接tio̍h內政部移民署通知,註銷市民顔聖憲的身分證kah戶口名簿戶籍了後,隨時發函通知顔某人十一月初十進前來辦理並繳回kah註銷戶籍。

顔某人到底犯tio̍h啥物天條大罪,tio̍h註銷身分證kah戶口名簿戶籍?原來伊十月初四ùi台灣出發去中國東北長春,ùi琿(hûn)春出境去俄羅的海參崴。初八轉來台灣。離開中國邊境去俄羅的時,the̍h中國政府所簽發的「一次性臨時護照」,外表kah一般正式護照仝一樣。根據「台灣地區kah大陸地區人民關係條例」第9條之1第1項規定:「台灣地區人民不得佇大陸地區設有戶籍抑是領用大陸地區護照。」若是「移民署發現有人領用中國護照,tio̍h一定依法通報當事人的戶籍所在地戶政事務所,廢止當事人的在台戶籍。」   一個旅行團敢干單顔某人一個人niā-niā?聴講一團有十八個人。是按怎另外十七個人攏無代誌?咱會想講chit-ê旅行團的領隊mā傷過疏忽,無提醒旅行團團員tio̍h小心細膩。失禮,顔某人本人正是領隊。照中國1998年六月初三發布的「中俄邊境旅遊暫行管理實施細則」有規定「台灣居民參加中俄邊境旅遊,tio̍h向組團社抑是代辦社報名交費,才由本人到該地市、縣公安機關出入境管理部門申請辦理旅行證件。公安機關簽發一次旅遊有效的護照,由邊境地區的組團社統一辦理出境手續。用了tio̍h攏總收回一次旅遊護照,bē使the̍h轉去作紀念。顔某人明知違法koh kā翕相pho佇伊面冊頂面,才會hông檢舉。   用中華民國護照前往俄羅tio̍h申請簽證,費用大約新台幣四千元,需要khah濟時間,佇中國申請一次性護照干單新台幣七百元,現省三千三。所以真濟台灣的旅行團攏用chit步。中國是按怎會開放chit-ê便利的門?因為台灣人若是出入中國用台胞證,出入俄羅用中華民國護照,按呢等於承認中華民國存在,若hō͘你省三千三,你tio̍h變作中國人、完全失去台灣人的身分,中國實在算足會和!   作一個旅行團的領隊,對本國kah相關國家的法律應該足清楚才tio̍h,beh chhōa團出去,根本bē使想beh做做違法的代誌。行政院陸委會講,為tio̍h國家安全kah利益,無容允chit類的行為。按呢咱tio̍h知chit-ê顏姓領隊白目koh m̄知死活、翕中國護照的相佇伊的面冊頂面展風神,咱政府無處理敢會使得?   聽講永過有一個戇人明明知影頭毛倚tio̍h火會to̍h起來,伊偏偏beh用家己的頭毛去試看māi,結果當然是hō͘火燒kah叫m̄敢。Chit-ê姓顔的旅行團領隊,明明是「頭毛試火」,燒tio̍h才來喝哀,無救。 
 
< Prev   Next >