首頁 arrow 綠色短評 arrow 台灣人飼匪諜飼kah肥chut-chut!

台灣人飼匪諜飼kah肥chut-chut! PDF Print E-mail
Written by 李南衡   
Friday, 24 November 2017
前海軍中將柯政盛因為hō͘中國吸收去,替中國佇咱國海軍發展組織,十一月十六,hông判刑一年兩個月定讞。 會惹起真濟人不滿,是因為是用「違反國安法」來起訴判刑柯政盛,並m̄是以「犯tio̍h內亂、外患罪」抑是「因現役期間貪污行為」來起訴判刑,所以伊雖然hông判刑hông關,猶原會tàng領中將退伍的終身俸、koh加十八%優惠存款,大約每個月會tàng領八、九萬,差不多是三個年輕奉公守法公務員的薪水。作匪諜會tàng作kah chiah hia-pai!   Chit-ê何政盛中將,bat作過海軍艦隊長、國防大學海軍學院院長、海軍艦隊司令部司令。司法單位調查發現,伊tī現役期間有經過台商牽線,佇海外有kah中國軍方官員見面,退伍了後koh替中國佇咱國海軍發展組織,紹介海軍姓周的kah姓徐的兩個少將kah中國解放軍特務佇澳洲見面,最高法院依違反「國家安全法」kā伊判刑一年兩個月,牽線的台商沈秉康判刑一年定讞。   Koh前馬防部退役少將許乃權,因為牽涉tio̍h中國解放軍鎮小江共諜案,以違反「國家安全法」hông判刑兩年十個月,已經tī今年九月出獄。照現行的規範,許乃權每個月一直有領、此後mā每個月會使領七萬五千外的退休俸。   立法院舊年(2016)十一月十八,三讀通過的《陸海空軍官士官服役條例》部分條例修正案明定,涉嫌內亂、外患、刑法瀆職罪、國家機密保護法洩密、國家情報工作法等現役卻未經停役、未hông移付懲戒、未hông彈劾的軍人,若是退伍了才hông判刑,未宣告緩刑定讞,看伊的刑期來減少退休俸,刑期三年以上未滿七年者,減少伊應領的50%,兩年以上未滿三年者,減少伊應該領的30%,一年以上未滿兩年者,減少伊應該領的20%。退役少將月退俸約有十萬外,chit-ê hông判刑兩年十個月的許乃權少將,減少三成、每個月mā猶有七萬外thang hō͘伊領kah爽oaiⁿ-oaiⁿ。   咱攏知影,文官武將無管伊是m̄是佇敏感單位上過班,伊的官階愈懸,伊會tang the̍h tio̍h的重要情報tio̍h愈機密愈重要,mā是中國愈愛吸收作匪諜的對象,bē使講伊已經m̄是原本職位身分、抑是已經退休了,所以tio̍h用「國安法」來判輕刑,完全失去法律的遏止阻擋違法的作用。一個退休的中將才判刑一年兩個月、退休的少將才判刑兩年十個月,作匪諜猶會tàng領退休俸七、八萬,明明是一個大漏洞,作匪諜hông掠tio̍h、hông判刑,咱台灣人每個月tio̍h koh the̍h七、八萬hō͘伊,感謝伊作匪諜出賣台灣。Che明明是世界無的奇事怪聞!   借問咧,是按怎台灣人tio̍h kā匪諜飼kah肥chut-chut!真正無伊法?
 
< Prev   Next >