首頁 arrow 綠色短評 arrow 李明哲hông判一工的刑to̍h嫌傷重!

李明哲hông判一工的刑to̍h嫌傷重! PDF Print E-mail
Written by 李南衡   
Friday, 01 December 2017
四十冬前,為tio̍h搜集有關台灣新文學的資料,全台灣走透透,當然會定定去各所在拜訪台灣前輩作家,像講去台中拜訪楊逵先生,聽伊講早前農民運動拍拚的故事,聽伊講按怎創辦編輯出版《台灣新文學》雜誌的苦楚。 當然mā會講起伊hông關佇台北青島東路國防部軍法處看守所,一直到送去綠島去海邊採老古石,扛去起監獄的牆圍仔關家己的故事。佇台北軍法處看守所的hit段時間上恐怖,透早天猶未光,兵仔入來m̄知beh押啥人出去聽審判,人人緊張kah bē喘氣,人押出去以後,逐個攏teh等待消息。兵仔押入來的人若頭犁犁,逐個心內有數,無人敢出聲。若嘴笑目笑入來,逐個tio̍h緊問講:「幾年?」無論「十年」、「二十年」,甚至「無期」,逐個攏會大聲喝「恭喜lah!」有一工一個少年家聽判刑送入來,氣phu̍t-phu̍t講:「我攏無按怎,是按怎判十二年!」無想講全看守所的人攏罵講:「免假lah!你一定有按怎,攏無按怎是十年lah。」楊逵先生問我:「幾十年過了,我到taⁿ猶m̄知影,是按怎『攏無按怎是十年』?」   無想tio̍h六、七十年前中國國民黨政府佇台灣所變的司法猴弄,今仔日中國共產黨政府佇中國猶teh sńg仝款的把戲,竟然判「攏無按怎」的咱台灣人李明哲五年,實在真了然!   咱台灣NGO(非政府組織)人權工作者李明哲,今年三月十九ùi澳門入境中國廣東省珠海市,隨時hō͘人舞失踨完全失聯。十工後才講in有掠人,六十九工後中國國務院對台辦才證實,李明哲因為涉嫌「煽動顚覆國家政權罪」,七十外工後的九月初六,才接tio̍h中國律師拍來電話講beh審判,百五工後的十一月二八才佇湖南省岳陽市中級人民法院宣判,李明哲因為「顚覆國家政權罪」,一審判五年有期徒刑。中國國台辦發言人馬曉光表示,李明哲犯罪事實清楚,證據確實充分。李明哲所作所為是m̄是危害大陸安全穩定,是由大陸判定的,m̄是由台灣當局kah一寡政治組織主觀偏見判定的。   咱台灣人主觀判定李明哲是台灣人m̄是中國人,佇台灣網路頂面所發表提倡民主、自由、人權的言論,是屬佇言論自由的範圍,啥罪mā無。中國主觀偏見判定李明哲有犯tio̍h中國的法律,但是根據中國《刑法》第八條規定:「外國人佇外國對中國犯罪,而犯罪地法律無處罰者,中國無管轄權。」中國無權判一個「攏無按怎」的李明哲五年。上好笑的是,中國判剥奪李明哲政治權利(咱台灣所講的「褫奪公權」)兩年,台灣人佇中國有啥政治權利?敢講m̄驚人笑!   「攏無按怎」的李明哲,伊的家後李凈瑜講:hông判一工的刑to̍h嫌傷重!
 
< Prev   Next >