首頁 arrow 綠色短評 arrow 台灣健保一孔烏lang-lang

台灣健保一孔烏lang-lang PDF Print E-mail
Written by 李南衡   
Friday, 08 December 2017
十二月初五,行政院衛服部公告,明年元旦起,海外就醫費用的核退(人佇海外看病的費用,轉來台灣會使核准退錢還伊),上懸的基準會小可減落來,上濟縮減五成七,估計會影響三萬六千人。 舊年(2016)台灣人佇海外就醫申請健保核退的有十三萬外件、大約是三億七千外萬,其中,中國tio̍h占十萬件、大約是二億六千萬。若照原本每人每遍2,001元降落來865元、急診每人每遍3,636元降落來2,412元、tòa院每人每工7,535元降落來5,295元,按呢,健保給付金額tio̍h會tàng省一億。雖然beh補「一孔烏lang-lang的台灣健保」來講,一億是小數目,但是有補khah嬴無補。咱kā健保署拍phok仔。   健保署講發現tio̍h國外有一寡院療院所開無實在作假的診斷書抑是醫療單據,健保署講有考慮若查tio̍h,會kā伊列作無beh核退的「烏名單」。拜託健保署免「考慮」,既然想tio̍h正確的代誌kā做落去to̍h tio̍h。健保署koh講有teh研擬佇中國就醫申請健保核退,tio̍h以公立病院、抑是健保署公告的病院為限。「趁燒拍鐵」tio̍h緊辦,m̄-thang拖沙。   政府為tio̍h beh hō͘台灣koh khah好,佇政府kah民間的中間有搭一個互動溝通的平台,由國家發展委員會建置一個「公共政策網路參與平台」,任何人攏會使為tio̍h眾人的代誌,佇平台the̍h出某一項代誌按怎做才會koh khah好的意見。頂個月,有網友佇chit-ê平台提案講,「全民健保,長年旅居國外,退保期間傷過長的,bē使作納保對象。」Chit-ê意見有得tio̍h主責機關衛福部的回應。現此時旅居中國的查埔藝人黃安聽tio̍h chit-ê消息氣kah pho̍k-pho̍k跳,佇中國的網路用垃圾話罵人,講che是針對伊設的「黃安條款」,koh講伊有照時納健保費。   民進黨立委林俊憲建議逐個beh酸黃安請khah細力一絲仔,若無黃安氣一下身體拍歹,koh轉來台灣醫病開咱的健保。林立委舊年tio̍h推動改革現此時的制度:「出國會使無繳健保費兩年,返來台灣隨時復保就醫」的無公平現狀。   真濟人干單teh講有繳健保費抑無,完全錯誤!健保是全台灣人民納稅金才有可能建立的,應該講有納稅金koh有繳健保費的人才有資格享受健保。當然tio̍h考慮一寡特殊的情況,像講佇國外的留學生kah伊的家屬、受派去國外受訓的專業人員、像講長期佇海外的商船kah漁船的工作人員等等。   台灣的健保一孔烏lang-lang,若無chia補一下、hia補一下,歸尾會愈來愈大孔。真濟人謳咾台灣健保真好,講台灣是寶島。但是台灣健保若是無改進無補孔,台灣健保保證會倒!
 
< Prev   Next >